RUAH LEH THLI VANGIN MAMIT LEH A CHHEHVELAH KAWLPHETHA HMUH THEIH A NI LO

 Nimin (Ni 26/5/2024) Pathianni tlai lama Ruah leh thli thawk avangin he thu buatsaih lai (Ni 27/5/2024 8:40 AM) thleng hian Mamit khawpui leh a chhehvelah kawlphetha hmuh theih a la ni lo a, line chhiatna lai hriat theih a la ni rih lo.

Pu H. Lalnunsanga EE P&E Mamit Division chuan W. Phaileng lam atanga Mamita kawlphetha lakluhna kawnga a chhiatna lai hriat theih a la nih loh thu leh line chhe laia zawnga siamtha tura vawiin lama an thawh chhuah tur thu a sawi a, kawlphetha hi lak luh thuai thei a nih a beisei thu Mamit Times zawhna chhangin a sawi.

Hetihlai hian, Zamuang lam atanga Mamita kawlphetha lakluhna pawh Bairabi leh Zamuang inkarah a chhiat avangin eng hi lakluh theih a ni lo a, helam pawhin siamthat tuma chak taka thawh niin kawlphetha lakluhna kawng tha hmasa zawk zawk atanga eng lakluh tum a nih thu Pu Sangtea chuan a sawi.

LUI DUNG THENFAI LEH TUI HNA HUMHALH

 Mizo Upa chuan “ mi pakhat a zun chuan midang an zung ve a, mi pakhatin tui a in chuan midangin an in ve nghal” an ti thin a, hei hian Mizote hi thiil intihhmuh awlsam tak, a tha lam a ni emaw, a chhe lamah pawh kaihhruai nuam tak kan nihzia a tilang chiang hle awm e.

Mizoram hmun hrang hrangah, Pawl hrang hrangin hmalakna lian tham tak tak kalpuiin luidung a hnawmhnawk awm thei ang anga thenfai hna an thawk chho mek a, kan ram hruaitu lu kan Chief Minister leh kan Ministerte hial pawh an thawk chhuak ve ta lawp lawp a nih hi. Hei hian kan luidungte an tawp zia leh kan tui a thianghlim tawk lohzia a tilang a, luia cheng nungchate tan chauh ni lo, mihring tan pawha himlo leh hrisello a nih avangin theih ang anga luidung thenfai hnathawh a tul tihna mipui thinlungah a lian chho zel a, hmun hrang hrangah helam hawi hmalakna hmuh leh hriattur a awm ta. Thil lawmawm tak a ni.

A tha lam zawng, mipui nawlpui, khawtlang tana tha tura hmalakna intihhmuh kawnga mi ke pen anga ke pen ve thei zirna In kan nei hi a hlu hle. Midang pawhin entawna, hetiang ang leh thil dangah pawh hmalakna kalpui chhoh zel atan a tha. Kan chhehvel lui dung khawi lai mai pawh hi a hnawk niai-nuai hle turah ngai ila, a sual lutuk loin a rinawm. Heng hnawk hi anmahnia lo awm ve tawp nilo in, mihring ten kan siam, kan tihhnawk a nih avangin mitin in bawlhhlawh thehthang danah zirtur kan la ngah em em tih a lang a, kawr remchang apiang bawlhhlawh paihna hmun emaw kan tih thinna rilru hi kan than san theihna tura inzirtirna pawh uar zawka kalpui a tul awm e.

He lam hawia hmalakna kan intihhmuha, sulsutu kan nei dawn a nih rau rau chuan, Mamit khawpui tuitlan - Lahmun lui leh Kurung Lui hnar lam te hi ngaihpawimawhah neih hmasa ila, a rah chhuah hlawkna leh hriselna mipuiin chawp leh chilhin kan tel nghal thei ang. Tin, he lam hawia hmalakna kalpui thei, pawl emaw, zirlai emaw, thianho emaw an awm a nih chuan sawrkar departmenta mawhphurhna neitute pawh hian ngaihven sela, mahni duhdan leh thiam ang anga kal darh satliah ngawt loin, thawhhona fel tak leh inkaihhruaina mumal tak neia tanho theih a duhawm. Chutiang tur chuan kan sawrkar department - a bik takin WATSAN emaw, UD&PA  lam emaw hian ngaihtuahna hmangin ruahmanna tha zawk kalpui thei se a duhawm hle a ni.

Tin, pawimawh em em bawk chu hei hi a ni : Mizo mipuite tui inchuha kan inhmuhmawh hun lo thleng tur kum kan pawh sei theihna tura tuihna humhalh leh siambelh kawnga tan lak a tul tak zet. Kum tin tlang ram Lo neih bansan a huan nghet neih a that zawkna leh hlawkna kan inzirtira, kan ramah hei hian zawm a hlawh em em. Kan lui hnar ram chhunga thing leh mau hmun vat chereua, tui hna ham khawmtu tam tak kan tihrem hian kan tuihna a titlem tih hi huan nghet neitu ten kan pawm ngam a ngai. Engkim hi inbuk tawk ngai a ni a, eizawnna leh sum hmuhna tura hmalakna kan bawh nat vak laia mihring mamawh leh sik leh sa chhe zel ven kawnga tangkai tak tak kan hlamchhiah si chuan, kan tumna leh kan hmachhawp lian pui pui pawh engmah loah a chang thei tih kan hriat tel ve a tha awm e.

Chuvangin, huan nghet zau tak tak kan siamna hmunah tui hna chhekkhawlna lam ngaipawimawh tel ila, a thlawna ruah vantla kan dawn luang ral puat tur lo chhekkhawl thei thil hrang hrang siam kawnga hmalakna kalpui leh midang zirtirtu, kawhhmuhtu ni tura tan lak a hun em em a ni. Chhung tinte van ruahtui chhekkhawl a tulna kan inzirtir uar ang bawkin huan lama ruahtui chhekkhawl kawnga inzirtirna kan mamawh ta hle.

Hmasawnna hnathawh kawngah, kan hma lam hun kum 20/30 thlir phak a ngai kan ti fo a, helam kawngah pawh hian kum tam tak thlir chunga vawiin atanga hmalakna kalpui a hun em em a ni.

 

SAVE TUIDAI OPERATION HMING VUAHIN GHS MAMIT ZIRLAI TEN LUIDUNGA BAWLHHLAWH AN THIAN

 

Government Mamit High School Eco Club chuan Save Tuidai Operation hming vuahin nimin Ni 24/5/2024 khan Mamit khaw bul, tlak lama awm Tuidai Lui hnar lama bawlhhlawh chi hrang hrangte an thian fai.

 GHS Mamit Zirtirtu leh zirlaite hi hlawm thumah inṭhenin hlawm hnih hian Lungsir leh Ngharpêt tuikhur aṭangin lui mawng lam hawiin an zawh a, hlawm thumna hi mi 4 zelin group hrang hrangah insiamin bawlhhlawh ken khâwmna tur kengin lui dung an zawh bawk. Zirlai leh Zirtirtute hian Kai li lam pana zawh thlain luia chêng nungchate tâna tha lo thei hmanraw hlui chi hrang hrang an chhar khâwmin an thianfai a ni. He Save Tuidai Operation hun hmang hian zirtirtu leh zirlai mi za (100) vel an thawk chhuak a ni.

Mamit Times zawhna chhangin Pu Lalramchhana, Headmaster GHS Mamit chuan an hun neih ang zela Mamit khawpui hnaivaia lui awmte pawh theih ang anga thenfai zel an tum thu a sawi.

Nimina GHS Mamit Eco Club te hun hmanna ah hian zirlai leh zirtirtu 90 zet an thawk chhuak a ni.

ZPM BLOCK HRUAITUTEN KAWNG SIAM MEK AN TLAWH

 Nimin Dt.24.5.2024 hian Central Block ZPM Mamit ten,NH No.6 Bairabi kawng thawm ṭhat mek chu a hmun ah an tlawh. He kawng thawm thatna tûr hian Ministry of Road Transport and Highway (MORTH) chuan Chêng Nuai 433 a ruahman a, tûnah hian thawm that hna thawh mêk zêl a ni.

ZPM Mamit Central Block thuchhuahin a tarlan danin, he hna hi Short Term Maintenance Contract hmang a thawh tura tih ani a, chhâng tu an awm siloh vânga MPWD Highway Division te leh Nidhi Creative infrastructure te nên a inremsiamna nei in, Highway Division te hian an thawk ta ani. He hna hi kum khat chhûng atân a ruahmanna ani bawk.

Highway Division Mamit ten an thawh tawh chin, Polytechnic atanga Sabual lui te Pathian tlâng hnaih lam km2 bial leh km 14-16 Damdiai khaw lam hnaih te thawm ṭhat hmasak ani a. Lung a chhe lai hnawhna tûr hi duh anga supply an dawn theih loh vang a muang deuh ni in a enkawltu Highway Division Mamit SDO chuan a sawi. Fur in min nan tak tak hma in a chhe zual lai hi chu hnawh hman an in beisei bawk.

Highway Division Mamit ten an thawh tawh chin chu Central Block ZPM Mamit tehian, a ṭha thawkhat viau anti a, tûn aia hmanhmawh deuh a fûr hma ngei a a chhe zual lai zo hman ngei  an duh thu thawktu te an hrilh.

Bairabi kawng thawm that hnathawh enna ah hian, Block President,Pu Selbuang an ho thei in Block lama a thawhpui ten an ṭawiawm a ni.

ZIRLAI 40 TE RUIHHLO KHAWIH LO TURIN AN INTIAM

 Mizoram Police, Mamit District Executive Force bul tumin vawiin chawhnu dar 1 khan Govt. M/S-I Mamita zirlaite hnenah dan leh hrai inhrilh hriatna leh ruihhlo hmansual laka fihlim a tulzia inzirtirna hun hman a ni.

He hun hi Pu Zosangliana,MPS SDPO/DSP Mamit chuan kaihruaiin Pu Stephen Lalremthara MPS DSP chuan naupang hnenah  zirtirna a pe.

Pu Stephena chuan zirlai naupangte chu an chhungkaw dinhmunah harsatna hrang hrang tawk, dinhmun duhawm lo taka ding pawh an ni thei a chumi chhuanlama hmanga ruihhlo khawih/ti chhin ve miah lo turin a chah. Nu leh Pa, chhungkuaah ruihhlo ti thin, khawih thin an awm a nih pawhin anmahni siamthatu nih tum turin a chah. Ruihhlo khawih hian ruk ruk pawisak lohna-ah a hruai a, kum tling lo pawi khawihnaa inhnamhnawih tam tak chu ruihhlo chi hrang hrang khawih thin an nih thu sawiin Jail a dah luh rem lo mahse an mahni enkawlna tur bik hmun a awm tih hrereng turin a chah bawk. "Ruihhlo chi hrang hrang laka fihlimna kawng awlsam ber chu a ti thinte kawm loh a ni" a ti.

Tunlaiah naupang humhalhna dan chi hrang hrang a awm avanga naupangte chu hrem theih loh an nih loh thu a sawi a, "in thatna tur a nih chuan in zirtirtute, in nu leh pate hian an hrem thei che u a ni" a ti.

Ruihhlo chungchang bakah social media hmanga dan bawhchhiatna (Cyber Crime) awm thei chi hrang hrang hrilh hriat an ni a, hetiang laka fihlim tura chahin an nu leh pate theuh pawh zirtirtu ni turin zirlai naupangte a chah bawk.

Vawiina dan leh hrai inhrilh hriatna leh damdawi hmansual hlauhawmzia inzirtirna ah hian Govt. M/S I Mamit a zirlai naupang 40 te chu ruihhlo ti ve lo turin an intiam a ni.

Mamit DEF hnuaiah hetiang ang hun hi Mizoram Policete hian an lo kalpui fo tawh a, hmun hrang hrangah chhunzawm zel tum a ni.

Kan neih sa tipung zawnga tan lak a tul

 Mizoram chhunga Vawk suattu hri (ASF) leng chuan ram chhung hmun hrang hrangah Vawk vulhtute harsatna leh chhiatna a thlen mek a, mi tam takin an vawk vulh thahnem tak an chan tawh a, anmahnia thi an awm a, an thih hmaa suat an awm bawk. He hrileng hian ziaawm lam a pan mai rih lo niin a lang.
 

Tun dinhmunah he hri hian Mamit District leh Mamit khawpui chhung a la lut ve chiah lo nia ngaih a ni a, hri hian a hrut ve theih dinhmuna ding kan ni tih erawh kan hriatreng a tul. Mamit District chhung leh Mamit khawpui chhunga Vawk vulhtute harsatna tawh theih hriain sawrkar Department  thuneituten an vei a, kan him zel theihna tura ngaihtuah sengin ruahmanna an duang a, dan leh thupek hmangin mipui tihtur leh tihlohtur chungchangah thupek chhuah a ni bawk. Heng thupek zawm mai hi kan him tlanna tur a ni tih mipuiin kan hriat a ngai.

Mamit District chhung leh Mamit khawpuiah hian ASF hri hi vawk pulh puk pukna tur khawpin a awm rih lo tih a chiang a, a lo lut a, tawrhna nasa taka a thleng leh a nih chuan thuneitute thupek awih loh vang emaw, kan fimkhur tawk loh vang a ni tihna a ni ang.

Sumdawnna kawnga duhamna leh hlawk lutuk tumna avanga Vawk leh Vawksa atanga siam eitur reng reng hmun dang atanga lakluh loh a him ber. Chutihrual chuan, he hri hi mihring ten awlsam takin kan pu darh thei tih hria ila, vawk, hri kai tawh kan hnaih vang leh a sa kan ei ringawt avang pawha put darh theih a ni tlat avangin, mi vawk vulhna hmuna dah duk duk a hun lo a, zin chhuah ni khua a Vawk sa ei lo ngam khawpa kan fimkhur a tul. Kan nitin mamawh lakna Aizawl khawpuiah a darh hle tawh a, khualzin zawng zawngte kan fimkhur a ngai. Fimkhur loh vang emaw, thuawih loh vang emawa he hri pu darhtu anga mipui ngaih kan hlawh hlauh zawngin min kawh rawn nasa hle ang.

Kan ngaihtuahna a awm atan leh kan tih atana tha em em chu kan ram sik leh sa, boruak ngeih tura Pathianin min duan sak kan ran vulh tipunga intodelh tuma hmalak a tulna hi hrechiang ang u.Ram dang vawk chi hrang hrang a tha bik leh hlawk bik anga ngaia kan insawi mawi siak hi bansan ila, thawn chhuah khawp nei zawk tura kan tulchhung vawk tipung zawnga tan lak a tul.

Sawrkar deprtment, helam kawnga mawhphurhna neitute pawh hi harh rawh se, kan neihsa, kan ram sik leh sa mil sa aia hmun dang atanga vawk chi hran hran lakluh sawimawi leh fakna titawp a, kan neihsa a that zawkna hmanga vawk vulhtute ngaihtuahna an hmin a hun. Mi thil it tlatna hi kan chhiatpui fo si a.

Tin, mipui himna tur ngaipawimawh zo lo khawpa pawisak nei lo, Vawk leh Vawksa atanga siam reng reng Mamit District chhung leh Mamit khawpuia lalut kan hria a nih chuan chiangkuang takin thuneitute hrilh hriat ngam a ngai. Thil tha ti atana siamkan nihna zawm leh mipui that tlanna tura hmalatu nih hi a Pathian thu em em zawk a ni.

SAWRKAR PISA A THAWKTU DAWR TUR AWM MUMAL LO FO MZP TEN AN NGAIMAWH

 Mizo Zirlai Pawl Headquarters Mamit chuan vawiin chawhnu dar 1 khan MJA Press Club Mamitah thuthar thehdarhtute an kawm a, Mamit khawpui chhunga sawrkar hnathawk, Officer leh staff hrang hrangte chawlhkar tir Thawhtanni leh kartawp Zirtawpnia Pisa a dawr tur awm mumal lo thin an ngaimawh thu an sawi.

Mamita sawrkar Pisa hrang hrangah, hnathawktu pawimawh tak tak te kar tir leh kar tawp lamah dawr tur mumal an awm loh fo avanga khaw dang leh tualchhung atanga Pisa dawr tum ten harsatna an tawh thin thu sawiin hei hi MZP Hqrs Mamit chuan a ngaipawimawh hle tih an sawi a, mipui harsatna tawh thin sutkian a nih theihna tura hmalak chhunzawm zel an tum thu an sawi a ni.

Hei bakah hian Mamit khawpui chhunga hnam dang ILP nei lo awm leh ILP nei pawh an ILP neih ang ni loa hnathawkte an ngaimawh thu an sawi a, hengte pawh hi enzuia Police lam nena tangkawpa hmalakna kalpui an tum thu an sawi. Mamit khawpui chhungah hnam dang, dan loa sumdawnna kalpui an awm leh awm loh pawh enzui an tum tih an sawi bawk.

Central enkawl zirna In (JNV) ah chi bil leh hnam bil anga inthliarna awm thin anga sawi awm pawh enzui leh siamthat an tum thu MZP Hqrs Mamit hruaitute chuan an sawi.

Tun hnaia HSLC leh HSSLC exam 2024 result chhuaka zirlai hlawhtling zawng zawngte thinlung takin an lawmpui tih an sawi a, hlawhtling ve ta rih lote pawh beidawng mai lo a thahnem ngai taka an zirna chhunzawm leh hram hram tura an duh thu an sawi bawk.

Vawiina MZP Hqrs Mamit ten Press Meet an neihah hian MZP hruaitute hi an President Lalthansanga’n a ho a ni.

MAMITAH RUIHHLO THAHNEM TAK HALRAL A NI

 Mamit District Executive Force (DEF) hnuaia Police Station hrang hrangin ruihhlo an man, court-in tihral tura thutlukna a siam tawh thahnem tak chu vawiin chawhnu khan Mamit District Hospital bawlhhlawh halna (Incinerator) ah halral a ni.

Police ten ruihhlo an man vawiina halralna hun hi Pi Lalthangpuii Pulamte, SP Mamit Districtin a hmanpui a, MJA Mamit District memberte leh MHIP aiawhte an tel bawk.

Vawiina damdawi halral tak hlut zawng hi Rs 9,82,250/- anga chhut a ni a, W. Phaileng, Kawrthah leh Kanhmun Police Station atanga man an ni a, heng damdawi hman sual theih halral takah hian khuh damdawi (Cough Syrup) ruih nana hman chi a tam ber a, heroin leh Ganja thahnem tak a tel bawk.

DEO MAMIT ENKAWL HSS PARUK ATANGIN ZIRLAI 160 IN PAWL 12 AN PASS

Vawiina MBSE in HSSLC Examination 2024 result a tihchhuah takah District Education Officer, Mamit enkawlna hnuaia awm Higher Secondary School paruk atangin zirlai 160 in pass.

Mizoram Board of School Education hnuaia HSSLC Examination 2024 result chu vawiin khan tihchhuah a ni a, District Education Mamit enkawl Higher Secondary School paruk atangin stream pathum - Science, Commerce leh Arts ah zirlai naupang 196 in exam an hmachhawn a, heng zinga zirlai 160 hi an pass.

Zirlai Exam beitu zawng zawng pass vekna HSS pahnih a awma chungte chu : Zawlnuam Higher Secondary School (Arts) leh Phuldungsei HSS (Arts) te an ni.

Govt. Mamit Higher Secondary School Mamit atangin  Arts Stream ah exam beitu 55 awmin 43 an pass a, pass percentage hi 78% a ni. Arts ah I Dist. 2, I Div 9, II Div 16 leh III Div 16 an awm.
Science Stream ah Candidate 10 awmin pakhat (1) in II Div ah a pass.

Commerce Streame ah exam beitu 10 awmin pali (4) an pass a, I Div ah pahnih leh II Div ah pahnih an pass a ni.

Kawrthah HSS atangin Arts stream ah exam beitu26 atangin 20 an pass a, Dist 2, I Div 4, II Div 10 leh III Div 4 an ni a, pass percentage hi 77% a ni.

West Phaileng HSS (Arts) atangin mi 57 an exam a 55 in an pass a, Dist 4, I Div 23, II Div 22 leh III Div 6 niin pass percentage 96%.

Zawlnuam HSS atangin exam beitu mi 25 awmin 25 an pass a, Dist 1, I Div 7, II Div 10 III Div 7 niin 100% an pass.

Kawrtethawveng HSS atangin regular candidate panga (5) atangin pali (4) in an pass a, I Div 1, II Div 3 niin private Candidate paruk (6) atangin pali (4) an pass a, II Div 2 leh III Div 2 an ni.

Phuldungsei HSS atangin Candidate awm zawng zawng pariat (8) in an pass vek a, Dist 1 leh I Div 7 an ni.

 

Hmasawn zawnga ke pen

 Mamit District chhung leh Mamit khawpui chhunga chengte hmasawnna turin hna lian tak tak thawh a lo ni tawh a, hmachhawp tam tak a awm mek bawk. Heng hmasawna hnathawh hrang hrangte hi tlawmngai pawl anga vil leh ven ngai lo tura ngaih a nih laiin, Mizoram pum ang pawhin hnathawh vil loh leh ven loh a nih vanga hna chhe tak tak hnutchhiah a tam em em a, a mak hle. Hei hian NGOs te an buai lohna turah a buaitir a, NGOs hruaitute duh khawp lohna a awm  phah fo. Tha taka hna enkawl leh viltu tur sawrkar official lam mawhphurhna hlen loh vanga NGOs leh khawtlang mipui, khawtlang leh ram tana thil tha duh vanga ngaihtuahna senga veitute rilru nat vawng vawng chang a tam em em a ni.

Mamit khawpui chhunga NGOs hruaitute chuan hmasawnna hnathawh tur hmachhawp chungchangah sawrkar thuneitute an hmua, an duhna an thlen a, hei hi a hunlai tak ni pawhin a lang a, a lawmawm. Siamthat theih leh tihdanglam theih ala awm a nih chuan sawrkar thuneitute pawhin kan NGOs hruaitute duhdan hi an ngaipawimawh turah ngai ila a tha ang e.

Hmalakna kan kalpui danah, hun la lola awm turah helam hawia ke pen leh a ngai a nih chuan kan tihdan erawh kan thlak danglam deuh a tha mai thei e. Vawiina kan NGOs hruaituten sawrkar thuneitute hnena an thu thlen hi Pawl hrang hrang thutlukna aiin Pawl hrang hrang hruaitute thutlukna angah a ngaih theih awm e.

Thil pawimawh leh lian tham, khawtlang leh pawl hrang hrang huapa thutlukna siam ngai a awmin, pawl hruaitu bawrte thu ringawt lak hi a fel ber lo mai thei. Hun thawl zawk siam a, pawl hrang hrangten anmahni huang chhungah theuh an ngaihdan leh duhdan an sawikhawm hnua thutlukna an neihte, an pawl hruaitute theuhin sawihonaah an pulut tur niawm tak a nih laiin, a lu bawrah, mi tlemte ngaihdan atanga thutlukna kan siam mai thin nia lang hi nakin zelah chuan kan insiamthat a ngaihna tur niin a lang. Mipui huap emaw, Pawl hrang hrang huapa tanrualna turah, tanrualna tha kan neih theih loh phah fo niin a lang a, a pawi em em a ni.

Engpawh ni sela, a hun laia kan duhna leh tha kan tih dan sawrkar thuneitute hnena kan luhpui ve ta ruak ruak hi hmasawnna a ni hrim hrim a, kan duhnate a hlawhtlin ngei theihna tura ngaihven zui kawngah, chawlloa ngaihtuahna sen a ngai tih hria ila. “Kan lo ngaihtuah ang” an tih vanga thlamuang taka awm nghal ngawt theih a ni lo tih kan hriatreng a tha awm e.

MZI Hqrs Mamit-in Kang tuarte hnenah Rs 35000/- ve ve hlan

 Tun hnaia Mamit khawpui chhunga chenna In kang vanga vanduaina tawk chhungkaw pahnih hnenah MZI Headquarters Mamit chuan nimin Ni 20/5/2025 khan chhawm-dawlna thilpek an hlan.

MZI Headquarters Mamit hian heng vanduaina tawk chhungkaw pahnihte chhawmdawlna tur pual hian Mamit khawpui chhunga hmun hrang hrangah zaithiamte zaina hum a buatsaih a, hemi tuma mi inphalte thilpek tlingkhawm Rs 70000/- chu chhungkaw pahnihtehnenah hian Rs 35000/- ve ve in a hlan a ni.

Chhawmdawl ngaite puala hun an buatsaihah, tlawmngai taka thawk chhuak MZI member zaithiam tak takte leh mi inphal thilpek petu zawng zawng chungah MZI Hqrs. Mamit chuan lawmthu a sawi.

NH NO 6 MAMIT KHAW CHHUNG LUT LO TURIN THUNEITUTE HNENAH NGEN

baw

 Mamit khawpui chhunga Tlawmngai Pawl hrang hrang aiawhte chuan nimin khan sawrkar mi pawimawhte hmuin Mamit khawpui leh Mamit District tana hmasawnna hnathawh tawh leh hmachhawp chungchanga an duhna te an thlen.

All NGOs Coordination Committee hruaitute chuan Bairabi atanga Mamit thlenga National Highway No 6 lo kal tur chungchangah Chief Minister Pu Lalduhoma leh PWD changtu Minister Pu Vanlalhlana hmuin Highway No 6 kaltlangna tur atana an duhna hmun an thlen a, NGOs ten an duh danah chuan he Highway lo kal tur hian Mamit khawpui lo thleng loin, Mamit Hmar lam atanga KM hnih vela hla, Polytechnic building bul atanga tlak lama her liama Luangpawl veng hnuai, Sports Complex hnuaia HN 44A/108 pawh turin rawtna an thlen..

Hei bakah hian NH 06 laih hnathawh mai tur chungchangah MoRTH lamin  MPWD Highway Division hnena mawhphurhna a lo pek tawh nia sawi pawh titawpa Company pangngai NHIDCL ten hna an thawh theihna tura hmalakpui turin CM leh PWD Minister hi an ngen bawk.

Heng bakah hian Highway 44A/108 atanga khawchhung luhna kawng siam leh laih zauh chungchang sawipui an ni bawk a, Thu lawmawm hmuh thuai beisei a nih thu All NGOs Coordination Committee hruaitute chuan an sawi.

SAWRKAR SUM HNAR NGAIHTUAH BELH

 Mizoram hi State intodelh lo, Central zem ringa kal ve hram hram, sum puk tur hmuh that leh that loh a zira hnathawk thei leh thei lo dinhmun a ding, State in a tum ve tur pek theih loh chang awm vanga hna leh thil danga harsatna tawk fo dinhmun a ding a nihna hi vawiin thlengin sutkian a la ni lo a, State sawrkarin harsatna a tawh fo sukiang tur hian tanlak a ngai hle.

Ram changkang leh State hmasawn zawkte dinhmun kan thlir pha a, an awhawm bik zia kan sawi chamchi a, kan State sawrkar lo enkawl tawhtute nasa tak takin kan dem a, mawhphurhna sang tak neitu an nih tlat avangin a awm viau. State sawrkarin intodelh zawnga ke a pen ve theihna tura kan ram chhung atanga  sum hmuh tipung tura hmalakna an kalpui apiang sawisel tum tlat kan ni lawi a, kan hahthlak deuh hlek bawk a ni.

Sawrkarin sum hnar lian tham a neih lohzia hrechiang em emtu, an partyin thuneihna an chan laia mangang ve tak takte pawh, midangin kawng zawn an tum apianga daltu lian tak an ni zel a, mipui rilruah a tulna lam tuh tum aia mipui rilrua sawrkar lai party apiang deusawhna thinlung puttir tuma hmalatu lian ber ber chu kan political party hrang hrangte hi an ni deuh vek  mai. Hei hi kan State thanmawh bawk lian tak ala ni reng.

Mipui rilru sukthlek a nilo zawnga kan kaihhruai luih tlat avangin sawrkara neitu rilru pu thei tur khawp leh thikthu tichhe ngam tur khawpa mipuiin sum an thawh vena tur kawng kan dal tlat a, kan dikna leh chanvo kan chawilar hle laiin kan tihve tur “chiah pek” erawh harsa kan ti a, chhiah hmu tlem apiang sawrkar pachhia a ni reng thin tih tichiangtu kan la ni fan. Hei hi a pawi tak zet. Sawrkara thawh ve kan neih tam poh leh mipuiin sawrkar kan khalh ngil thei ang. Thawh ve neih tam aia a thlawna dawn tur insawi hmuh kan chin thin hi kan chhiatpui a, sawrkar sum bawm tiruaktu mai a ni.

A lehpeka tlin leh loh hlau, thuneihna leh Lalna ringawt um thin mihringin min hruaia, hlauh ngah lutukna avangin hma kan sawn thei lo. Hun lo la awm tur thlir chunga sawrkar leh mipui dinhmun siamthat avanga tuar ngam leh mipui kaihruai ngam, helam hawia hmalakna kalpui ngam hruaitu kan mamawh. Vawiina kan State sawrkarin a mamawh lian tak chu tam zawka sawrkar sum hmuhna tur ngaihtuah a ni.He lam hawia na taka kal ngam sawrkar hruaitu kan mamawh tak zet.

Mipui lam kan insiam that a tul hle. Sawrkara kan sum chhun ve tur ang ang a pun deuha chiau chiau tur kan ni lo.Mipui dinhmun a chhiat vangah kan puh a ni mai thei, mahse, mipui sum thawhkhawm telloin kan sawrkar dinhmun hi siamthat thut theih a ni lo a, sawrkar ber a pachhiat chuan mipui dinhmun chawkan thut theih a ni lo bawk tih hriat a tha. He thil hrechiang em em tu Political Party hrang hranga a meizang hlaptute hi a nilo zawnga mipui fuihpawrh kawnga phur phur an ni thin. Hei hi sim a tul. Chuti a nih loh chuan “Kan hma lam thim a kiang zel ang....” tih hlate hi tui takin sa thin mahila, kan State rethei tak hi “thim thuah hnih” in a tuam reng emaw kan ti tlat tho ang.

LAL FANU A BORAL, VAWIINAH VUI A NI ANG

 Pi Mangkhumi (87), Pu Thanthuama (L) fanu chu nizan (Ni 16/5/2024 zan) dar 8:00 khan Mamit District Hospitalah a boral a, nizanah a ruang hi tlaivarpui niin vawiin chhun dar 12:00 ah vui a ni ang.

Pi Mangkhumi hi Lal lal hun laia Mamit khaw Lal pathumna, Pu Thanthuama  (L) fa sawm (10) zinga palina niin Mamit Lal fate zingah chuan a dam rei ber a ni.

Pi Mangkhumi hi April thla tawp lam  khan an In chhungah a tlusual a, damdawi In lama entir a nih hnuin anmahni In lamah enkawlzui a ni a, a dam that leh mai beisei a nih laiin a bawk sawp zui ta a, Ni 15/5/2024 (Nilaini) khan Mamit District Hospial ah dah luh a ni a, a dam leh theihna tura theih tawp chhuaha enkawl a ni chungin nizan (16/5/2024 zan) dar 8:00 khan a lei hringnun a lo chhiar zo ta a ni. Pi Mangkhumi hian fapa pahnih leh fanu pakhat a nei a, a fapa te pahnih hi a lo sun tawh a, a fanu pakhat a kalsan a ni.

DTO MAMIT IN KUMIN CHHUNGIN RS 37,74,654/- A THAWK CHHUAK TAWH

 Kum 2007 a hawn tawh, District Transport Office Mamit chuan hawn a nih atanga Ni 15/5/2024 thleng (Kum 17 chhungin) Lirthei chi hrang hrang 7098 a ziaklut/chhinchhiah (Registered) tawh a, DTO Mamita lirthei register hi a pung chak lo hle nia ngaih a ni.

DTO Mamita lirthei register zat a pun chak loh chhan hi sawi fak theih ni lo a, lirthei a pung lo lam ni loin, remchan zawkna avanga lirthei neitu ten District dang, a bik takin Aizawl Districta an register tam vang nia ngaih a ni bawk.

DTO Mamit ah Ni 15/5/2024 thlenga lirthei 7098 register a nih laiin kumin January ni 1 atanga Ni 15/5/2024 thleng khan lirthei chi hrang hrang 228 a register tawh a ni. Hemi hun chhung vek hian lirthei khalh zir phalna (Learner License) 576 pek chhuah a ni tawh a, lirthei chi hrang hrang khalh phalna (Driving License) 184 pek chhuah a ni tawh bawk.

DTO Mamitin kum 2024 January ni 1 atanga Ni 15/5/2024 thlenga sawrkara chhun tur sum a thawh chhuah tawh zawng zawng hi Rs 37,74,654/- a tling tawh a ni.

KANGMEI VANGA VANDUAINA TAWKTE CHHAWMDAWLNA TURIN MZI TEN VEHBUR AN KHAWN

 

Mizo Zaimi Inzawmkhawm (MZI) Headquarters Mamit chuan vawiin hian Mamit khawpui chhung hmun hrang hrangah vehbur an khawn.

Tun hnaia Mamit khawpui chhunga chenna In kang vanga vanduaina tawk chhungkaw pahnih - Pi Lungtiawii te chhungkua Mamit Dinthar leh Pi R. Lalfakawmi te chhungkua Mamit Lungsirte chhawmdawlna pualin MZI Headquarters Mamit chuan vawiin khan Mamit khawpui chhung hmun hrang hrangah zaiin vehbur an khawn a, he hunah hian Mamit khawpui chhunga zaithiam thahnem tak an zai a ni.

MZI ten kangmei vanga vanduaina tawkte chhawmdawlna tura vehbur an khawn hi vawiin hian a tawp mai dawn lo a, mi inphal, tanpui ngaite tanpui tura thilpek pe duhte tan 8974807066 ah gpay hmangin tanpuina pek theih a ni a, thilpek hlan tur chu la inhriattir leh tur a nih thu MZI Hqrs Mamit hruaitute chuan an sawi.

DCSO MAMIT IN BUHFAI A CHHEK KHAWL MEK, BUHFAI DINHMUN A ZIAAWM

 District Civil Supply Officer Mamit hnuaia Supply Centre tam zawk atangin mipui hnena sem tur ration buhfai May 2024 quota, retailerte hnenah pek chhuah fel a nih tawh laiin pek chhuah mek a awm bawk.

Mipui hnena sem chhuah tur ration buhfai chhekkhawl dan dinhmun leh harsatna tawh chungchang Mamit Times zawhna chhangin Pu Lalneihkima DCSO Mamit chuan tun hnaite a ration buhfai pek chhuah kawnga khaihlak deuh awm chu Kum 2023 Nover thla atanga buhfai thleng mumal loin a nghawng chhoh zel kha a nih thu a sawi a, tun dinhmunah erawh Mamit District chhunga supply centre a buhfai chhek khawl dinhmun a ziaawm viau a, hetiang ang zela a kal theiha, harsatna dang a awm a nih loh chuan buhfai sem chhuah kawngah harsatna a awm loh beisei a nih thu a sawi.

Mipui hnena buhfai sem chhuah a tlai deuh thin chu tihziaawm tuma tan lak mek a ni tih Pu Kima DCSO chuan  a sawi a, hetiang tur hian sawrkar leh FCS&CA changtu Minister pawhin theih tawp an chhuah tih a sawi bawk. Khawl hmeh loh vanga ration buhfai lak tur pek kep leh kep loh chungchang sawiin e-POSS hmanga buhfai pek chhuah vek a ni tawh a, hun hmasa lama off-line period hawn thin ang kha a awm tawh lo a, online a pek leh chhinchhiah vek a ni a, khawl an hmeh loh chuan an quota lak tur  la awm reng anga a lan avang a nih thu a sawi a ni.

Tin, Mamit leh W. Phaileng Centre te chu buhfai chhek khawl teuh ngaia ngaih a nihloh vangin mamawh ang zela pek thin an ni tih sawiin Centre dangah erawh fur chhung atan buhfai chhek khawl mek a nih thu a sawi.

Ni 14/5/2024 thlenga DCSO Mamit hnuai Supply Centre hrang hranga buhfai chhek khawl dinhmun hetiang hi a ni :
1. Mamit Centre ah thla khat atan buhfai 1195.22 qtls mamawh a ni a, retailer hnenah May 2024 quota pek chhuah mek niin godown ah 666.47 qtls a awm. Mamit Centreah hian Ni 1.1.2024 atang khan buhfai 6371.28 qtls a thleng tawh a ni.

2. W. Phaileng Centre ah thla khat atan buhfai 968.20 qtls mamawh a ni a, retailer hnenah May 2024 quota pek chhuah zawh tawh niin godown ah 347.14 qtls a awm. W. Phaileng Centreah hian Ni 1.1.2024 atang khan buhfai 12091.87 qtls a thleng tawh a ni.

3. Phuldungsei Centre ah thla khat atan buhfai 153.89 qtls mamawh a ni a, retailer hnenah May 2024 quota pek chhuah zawh tawh niin godown ah 130.82 qtls a awm. Phuldungsei Centreah hian Ni 1.1.2024 atang khan buhfai 909.94 qtls a thleng tawh a ni.

4. Pukzing Centre ah thla khat atan buhfai 138.24 qtls mamawh a ni a, retailer hnenah May 2024 quota pek chhuah zawh tawh niin godown ah 55.65 qtls a awm. Pukzing Centreah hian Ni 1.1.2024 atang khan buhfai 1750.40 qtls a thleng tawh a ni.

5. Silsury Centre ah thla khat atan buhfai 429.40 qtls mamawh a ni a, retailer hnenah May 2024 quota pek chhuah zawh niin godown ah 3159.48 qtls a awm a, hei hi December 2024 thleng daih tur a ni. Silsury Centreah hian Ni 1.1.2024 atang khan buhfai 5019.18 qtls a thleng tawh a ni.

6. Marpara Centre ah thla khat atan buhfai 835.14 qtls mamawh a ni a, retailer hnenah May 2024 quota pek chhuah zawh tawh niin godown ah 5270.14qtls a awm a, hei hi November 2024 thleng daih tura a ni. Marpara Centreah hian Ni 1.1.2024 atang khan buhfai 9696.83 qtls a thleng tawh a ni.

7. Tuipuibari Centre ah thla khat atan buhfai 828.97 qtls mamawh a ni a, retailer hnenah May 2024 quota pek chhuah zawh tawh niin godown ah 576.31 qtls a awm.Tuipuibari Centreah hian Ni 1.1.2024 atang khan buhfai 4969.04 qtls a thleng tawh a ni.

8. Kawrtethawveng Centre ah thla khat atan buhfai 464.61 qtls mamawh a ni a, retailer hnenah May 2024 quota pek chhuah zawh tawh niin godown ah 2168.53 qtls a awm a, hei hi September 2024 hleng daih tur a ni. Kawrtethawveng Centreah hian Ni 1.1.2024 atang khan buhfai 3862.98 qtls a thleng tawh a ni.

9. Tuidam Centre ah thla khat atan buhfai 363.46 qtls mamawh a ni a, retailer hnenah May 2024 quota pek chhuah mek niin godown ah 2537.35 qtls a awm a, hei hi October 2024 thleng daih tur a ni. Tuidam Centreah hian Ni 1.1.2024 atang khan buhfai 3499.55 qtls a thleng tawh a ni.

10. Kawrthah Centre ah thla khat atan buhfai 266.80 qtls mamawh a ni a, retailer hnenah May 2024 quota pek chhuah zawh tawh niin godown ah 1087.94 qtls a awm a, hei hi September 2024 thleng daih tur a ni. Kawrthah Centreah hian Ni 1.1.2024 atang khan buhfai 2097.54 qtls a thleng tawh a ni.

11. Rengdil Centre ah thla khat atan buhfai 558.87 qtls mamawh a ni a, retailer hnenah May 2024 quota pek chhuah zawh tawh niin godown ah 2046.90 qtls a awm a, hei hi August 2024 thleng daih tur a ni. Rengdil Centreah hian Ni 1.1.2024 atang khan buhfai 4219.184 qtls a thleng tawh a ni.

12. Zawlnuam Centre ah thla khat atan buhfai 402.51 qtls mamawh a ni a, retailer hnenah May 2024 quota pek chhuah zawh tawh niin godown ah 2299.22 qtls a awm a, hei hi October 2024 thleng daih tur a ni. Zawlnuam Centreah hian Ni 1.1.2024 atang khan buhfai 4304.32 qtls a thleng tawh a ni.

13. Kanhmun Centre ah thla khat atan buhfai 375.67 qtls mamawh a ni a, retailer hnenah May 2024 quota pek chhuah zawh tawh niin godown ah 2207.60 qtls a awm a, hei hi October 2024 thleng daih tur a ni. Kanhmun Centreah hian Ni 1.1.2024 atang khan buhfai 4022.28 qtls a thleng tawh a ni.

Kum 2024 January Ni 1 atanga Mamit District chhung Supply Centre 13 a buhfai tih thlen tawh zawng zawng hi 61814.39qtls a ni a, District pumin thla khata buhfai mamawh zat 6980.98qtls niin tuna supply godown hrang hranga buhfai chhek khawl zawng zawng zat hi 22554.55qtls a ni.

Zirna In enkawltute siamthat hmasak an ngai

 MBSE in HSLC Exam 2024 result a tichhuak ah, Mizoram chhunga sawrkar sikul thahnem takah HSLC exam beitu Pass awm miah lo an awm leh ta a, hei hi thil thar a ni lo a, hun rei tak atanga sikul thenkhat dinhmun lo nih tawh thin dan a ni.

HSLC Exam beitu, pass awm miah lohna sikulte enzuia hmalak a nih tur thu School Education Department changtu Minister chuan Chanchinbumite hmaah a sawi chhuak a, a lawmawm hle. Awmze nei zawka hmalakna an kalpui thuai thuai a nghahhlelhawm hle a ni.

Heng zirna In, HSLC exam beitu pass awm miah lohna sikulte hi enge an dinhmun, eng ang harsatna nge an tawh tih ngun taka zirchian hmasak a tul ngeiin a rinawm a, chung zir chianna atanga sawrkar in a tihtur a tih loh emaw, a tihlohtur a tih emaw a awm a nih pawhin huaisen taka an siamthat ngam a tul ang. Sikul leh a thawktu awm ang angte thiam loh chantir tum ngawt leh thuneihna lek nghal ngawtna tur chi a nih hmel loh a ni.

Kan sawi fo tawh thin, sawrkar sikul mal ringawt ni lo, sikul enkawltu School Education department atang hian siamthat an ngai tih kan hmuhfiah a hun hle. Mizoram sawrkar hnuaia department zingah thawktu nghah ber pawl, sawrkar sum hmang tam berte zing ami an ni ang. Kum khata an sum hman ral leh zirlai thiamna paw tak tak paw chhuak theia an chher chhuah zat hi a inphu in kan hria em ? Ngaihtuah ngai a ni. Thawktu leh an enkawl an tam deuh avanga deldul tura inngaih ngawtna hi chhuanlam tling a ni hek lo. Chawm leh hrai, enkawl leh kaihhruai an ngah poh leh an thawk rim mai tur a ni ang. Sawrkar hnathawk zingah, Sakhuanna thil, Pawl leh Khawtlang thila mahni hnathawhna hmun chhuahsan tam berte hi School Education Department hnuaia thawkte hi an ni hial mai thei. An hnathawhna hi an rawngbawlna a ni tih hrechiang tur khawpa chunglam atanga inenkawlna khawng zawk an mamawh pawh a ni mahna.

Mizoram chhunga Elementary School leh Secondary Schoolah zirtirtu indaih tak tia sawitur an vang viau mai thei. Chutiang bawkin zirtirtu leh zirna In enkawl kawnga mawhphurtu District Office leh Sub-Division Office ah thawktu pangngai awm mumal lohna a tam hle bawk ang. Hengte hi siamthat ngai hmasa a ni. Pisa lama thawk tura zirtirtu pawh pen an tam lutuk te hi vei a hun a, Aikal la kan buaipui aia nasaa buaipui tur a ni.  Pisa lama thawktu awm mang lo vanga zirna In in a tuar dan hi hmu thiam ila, hei hi kan zirna In te harsatna tawh lian tak, zirlaite hmakhua tichhe thei a ni tih hriat a hun.

Vawiina kan District Education Office leh Sub-Division Officea  thawktu dinhmun thlir ila, zirtirtu thu zawng zawng hi zirtirna an pekna tur hmunah dah let vek ni sela, kan Zirna In enkawltu Pisa hi an buai hle ang. Chutiang chiah chuan zirtirtu pawh pen hi zirna In in a tuar hle a ni.

Pawl sawm leh Pawl sawm pahnih Exam result a chhuah a pianga sawrkar Zirna In thenkhat ten demrawn an hlawh fo thin hi a reh theihna turin, a chunglam, anmahni enkawltu deparment hi siamthat leh thuam chak a tul tak zet e.

DEO MAMIT HUAM CHHUNG ATANGIN ZIRLAI 574 IN HSLC AN PASS

 Mizoram Board of School Education in nimina HSLC result a tichhuah takah Mamit District Education Officer thuneihnain a huam chin atangin zirlai 574 in HSLC an pass a, exam beitu zawng zawng atanga za zela 70.17 in an pass. Mamit District chhungah zirlai pass awm miah lohna High School a awm lo a, exam beitu zawng zawng pass vekna High School panga a awm.

Mamit District Education Officer huam chhungah hian Govt. High School  sawmpanga (15) atangin zirlai 295 in exam an beia mi 202 in an pass. RMSA High School sawmpahnih (12) awmin chung High School atang chuan zirlai 142 in exam an bei a, mi 73 an pass a ni. Grant-in Aid High School sawm (10) a awm a, heng high School atang hian zialai 110 in exam an hmachhawn a mi 68 an pass a ni. Lumpsum Grant-in-Aid High School pahnih (2) a awm a, chung atang chuan zirlai 36 in exam hmachhawnin mi 26 an pass. Private High School pakua (9) atangin zirlai 235 in exam an hmachhawn a mi 197 an pass a ni. Heng bakah hian High School pathum (3) atangin Private candidate 31 awmin chung zinga 8 chuan an pass bawk.

Kum 2024 HSLC Exam MBSE in a buatsaihah DEO Mamit huam chhung High School 48 atanga exam beitu zawng zawng mi 818 an ni a, chung zinga 574 chu an pass a ni. Exam beitu zawng zawng pass vekna School panga (5) a awm a, chungte chu :
 1. Govt. Zamuang High School 2. Govt. Rawpuichhip High School 3. Govt. Phuldungsei High School 4. Pukzing RMSA Secondary School 5. BCM Damparengpui te an ni. Exam beitu Pass awm miah lohna High School a awm lo thung a ni.

KUM 2024 CHHUNGIN MAMIT DISTRICTAH CHENNA IN PARIAT A KANG TAWH

 Kum 2024 January thla atanga May Ni 14 thleng khan Mamit District chhungah chenna In kang pariat a awm tawh a, mihring nunna chan erawh an awm lo.

Disaster Management & Rehabilitation Branch, DC Office Mamitin a chhinchhiah danin Kum 2024 January atanga May Ni 14 2024 thleng khan Mamit District chhungah Chenna In kang pariat a awm tawh a - Mamitah pahnih, Nalzawlah pakhat, Saipuiluiah pakhat, Kanhmunah pakhat, Chhippuiah pakhat, Tuirumah pakhat a ni. Chenna In kang avanga miohring nunna chan erawh an awm lo thung.

Chenna In kang tuarte chhawmdawlna turin DM&R atang hian Rs5,54,750/- pek chhuah a ni tawh a ni.

Kum 2024 January atanga Ni 14 May 2024 chhung khan Mamit District chhungah Thli leh rial avanga chenna In chhia 157 a awm tawh a, heng chhiatna tuartute chhawmdawlna tur hian DM&R Branch, DC Office, Mamit atangin Rs 6,28,000/- pek chhuah a ni tawh bawk.

Thli leh Rial avanga chenna In chhia awmna khua DM&R Branch in an chhinchhiah dan hetiang hi a ni : Zawlnuam, Bawngva, Mamit, Reiek, Kawrthah, Mualthuam, Kawrtethawveng.

KUM 2023 SEPTEMBER THLA A HAWN TAWH, MAMIT DISTRICT HOSPITAL KHUM ZA AWM THEIHNA SAK ZAWH A LA NI LO

 Kum 2023 September Ni 26 a ropui taka hawn, Mamit District Hospal building, khum za awm theihna tur chu vawiin thlengin sak zawh a la ni lo.

Vawiin khan ZPM Central Block Mamit hruaitute chuan District Hospital Mamit Khum 100 awmna tur building, ni 26 September 2023 a hawn tawh tun thleng a luah luh la nilo chu a hmunah an tlawh a, Dr. Lalrinfela. H, DMS Mamit in a lo dawngsawng a ni.

District Hospital Mamit Khum 100 awmna tur Building hi ni 26 September 2023 khan khatih hunlaia Health Minister Dr. R. Lalthangliana chuan hawng in, a hawnna programme ropui taka neih a ni bawk a ni. Mahse, hospital building hawn atanga thla 8 hnu vawina ZPM Mamit Central Block hruaituten Hospital building an tlawh pawh in building hi siam/sak zawh ala ni lo niin ZPM Mamit Central Block hruaitute chuan an sawi.

Hnathawktuten an sawi dan in District Hospital Mamit building hawn a nih lai khan 60% vel chiah hna la zawh a nih thu leh tunah hian 93% vel hna hi zawh a nih tawh thu an sawi a. Tin, Hospital building sak hi a design tam tak a fuh tawk lo hle a, Room tam zawk phei chu chhun engah pawh ni eng a luh theih loh avangin a thim vek thu leh tukverh a tlem avangin boruak tha a luh tam theih dawn loh avangin hriselna atan a pawi thei dawn niin a lang bawk a ni.

ZPM Mamit hruaitute chuan hospital sak leh design hun lai khan hospital tha leh changtlung neih aia sum leh pai siamna atana hman an ngaipawimawh zawk emaw tih tur zawk a, a awm chu pawi an tih thu an sawi a. Khum 100 awmna Hospital building chhawng 5 meuhah Fire Exit (Emergency Exit) Pakhat chiah a awm chu a tha lo in a him lo hle ah kan ngai a ni. Chumai bakah Hospital thawktute duh dan ang nilo a Labour Room (Nau neihna) siam a ni chu pawi a hle a, hun lokal zel turah harsatna a awm ang tih a hlauhawm hle a ni. Vawiin a ZPM Mamit hruaituten District Hospital Mamit Building tlawh a nih lai pawh hian, hmun thenkhat chu siam that leh ngai nghal a awm nual tih hmuh a ni.

District Hospital Mamit Khum 100 awmna tur building sakna atan hian a vaiin 17.93 Crore ruahman niin, Power Finance Corporation Ltd. CSR atangin 70% (12.55 Crore) hmuh niin, a bak zawng (30%) hi State Government atangin hmuh a ni. Hospital Main Building sakna atan hian 16.93 Crore hman a ni a, 1 crore hi a hnamrua leina atana tih a ni bawk a ni.

Dr. Lalrinfela H. District Medical Superitendent, Mamit chuan Hospital building thar chu luah luh vat a nih theih nan hnathawktute pawh a theih ang anga hna chak zawka thawk tura nawr reng an nih thu leh a dik lo leh tha lo lai pawh siamtha tura an ngen thin thu a lo sawi a. Hospital building tha zawk an neih ngei theih nan ZPM Mamit hruaitute chu theih tawp chhuahpui turin a ngen.

Tin, ZPM Mamit Central Block hruaitute chuan Hospital Building Khum 100 awmna tur chu mipuiten tangkai taka an hman theih nan leh luah luh vat a nih theih nan theih tawp an chhuah zel tur thu leh Health Minister pawh a rang thei angbera a hmunah ngei tlawh tura an sawm tawh thu an sawi a, Dr Lalrinfela H, DMS Mamit leh a thawhpuite thahnemngaihna leh inpekna chu fakawm an tih thu an sawi bawk a ni.

“ZMP Mamit Central Block chuan, District Hospital Mamit Khum 100 awmna building sak zawh a nih hma  leh, a nihna tura mipuite chhawr theih tura a awm hma a, hmingthat hlawh duh luat avanga hawn ringawt a ni kha zahthlak kan tiin pawi kan ti hle a, mipuite  ngaih-nepna leh hmuhsitnaah kan ngai hial a ni” an ti.

 

IN SAK HNA THAWK MEK

 

May Ni 5, 2024 zana bungrua engmah chuh hman loha kang ralta, Pi R. Lalfakawmi Mamit Lungsir veng amite chenna tur chu khawtlangin a sak hna an thawk mek.

Pi R. Lalfakawmi te chenna tur hi a nu Pi C. Zoramliani in rel sa (RCC) siam pum mai tura tih a ni a, In sak hna thawk hian kar kalta atang khan Lungsir Branch YMA hnuai section hrang hrangte an inhnathlan chhawk a, vawiin thleng hian ni ruk an hnatlang tawh a ni. Pi Faki te chenna tur sakna tur hian veng chhungah vehbur khawn a ni a, hmun hrang hrang tangin mi inphalte thilpek dawn a ni a, heng hmang hian In hi 36 ft biala sak a ni. 

Pi Faki te chenna tur hi peih theih thuai beisei a nih thu Lungsir Branch YMA hruaitute chuan an sawi a, In sakna tura phal taka thilpek petute zawng zawng chungah lawmthu an sawi.

SAWRKAR SIKUL HMASAWN MEK, NU LEH PATEN AN BAWH GOVT. P/S-I MAMIT. BUILDING LEH CLASS ROOM IN A ZO LO TAN

 

Kum 1956 a din, Mamit khawpui chhunga School hlun ber, Govt. Primary School-I Mamit hi hun engemaw chen zirnna kawngah a tlachhe ve nasa hle a, hun kal tawhah Govt. P/S-III nena P/S-III buildinga sawikhawm (Amalgamate) rawtna a awm a, khawtlang nu leh pa kalkhawm ten an remtih loh avangin P/S-III hi P/S-I ah sawikhawm a ni ta zawk a ni.

Nu leh pate rualawhna leh zirna kawnga intlansiakna avangte, hmasawnna avanga mimal zirna In lo awm belh zel avangin he Schoolah hian zirlai awm mumal loh hun chhung a awm a, tun dinhmunah erawh he school hian hmuh theihin hma a sawn tawh thung a ni. Kum 2021-2022 sessionah zirlai  - 16 an awm a, Kum 2022 - 2023 sessionah zirlai 79 awmin Kum 2024-2025 session  Ni 13/5/2024 thlang khan zirlai 112 an awm tawh a, admission ti an la awm ve reng bawk. School building leh Class Room in a zawh meuh tawh loh avangin admission tih kawngah harsatna an tawk mek a ni.

Kum 2022-23 atang khan Govt. P/S-I ah hian ECCE hawn tan a ni a, kumin 2024 - 25 session atang hian KG Class hawn belh a ni. Tunah Head Teacher bakah  zirtirtu panga an awm mek a, Class tin daih an awm loh avangin School Grant leh a remchang chang thawh a pawt khawm in Voluntary Teacher 1 an rawih belh mek.

School building sak zawmna tur hian Mamit bialtu MLA Pu H. Lalzirliana hnen atangin MLALADs Fund cheng nuai hnih hmuh a ni a, he sum hmang hian  Classroom leh Zirtirtu Office sak belh a ni. Mamit Venghlun VC, Mamit Venghlun Branch YMA leh Zirlai nu leh pate sum leh tha thawhkhawmte leh sum hmuh ang ang zirtirtu ten dik leh fel taka vawng in mamawh zualpui chu an la in phuhruk hram hram a ni.

Govt. P/S-I in zirna kawnga hma a sawn chhoh zel kawngah Head Teacher Pu Ngurthansanga Sailo chuan khawtlang hruaitute, tlawmngai pawlte leh zirlai nu leh pate tanrualna vang a ni tih a sawi a, ECCE leh KG Class hi Sawrkar atanga hawng tura tih ni lo mahse, “Sawrkar School chhe zel tur chhanchhuahna tur leh chhungkaw harsa te te ten fee leh thildang chawia School danga harsa chung chunga an kal tir hi kan lainat in zirna tha ve tho dawng chunga Sawrkar School a a thlawna lo enkawl hi kan ngaihlu a. Thla tin hian Chhungkaw sum tam tak kan hum sak thei ah kan inngai” tiin Pu Thantea chuan a sawi.

He School building tha tawh lo tak hi kum 2019 chho ah khan cheng nuai thum emaw vel sengin a chhe zual lai thawm that a ni a, chu chu vawiin thlenga school building pui ber hi a la ni rih a ni.  National Bank For Agriculture And Rural Development (NABARD) atanga Rural Infrastructure Development Fund (RIDF) Loan hmanga Mamit District chhunga Director School Education Department kaltlanga hnathawh, School building sak that, thawm that leh class room siam belh hna sawm pali (14) a awm a, heng hnate hi thawh zawh vek tawh anga tarlan niin heng zingah Govt. P/S-I Mamit pawh hi a tel a ni.

NABARD RIDF Loan hmanga School building sak hna thawh zawh tawh anga tarlan Govt. Primary School I Mamit chu he hnathawh nia sawi hun chhungah hian a building pum sak that a awm lo nia hriat a ni. Details and Completed reporta tarlan a nih danin, Govt. P/S-I building Mamit sak thatna tur hian NABARD RIDF Loan Rs 26.25 chu Ni 24.06.2019 khan pek chhuah anga tarlan niin School building sak that hna hi Ni 31.03.2022 ah zawhfel anga tarlan a ni.

MAXI CAB INTLAN CHHAWK DAWN

 Mamit-Aizawl Maxi Cab service chuan May thla chhung hian intlan chhawk turin ruahmanna an siam a, hetiang hi Association in ruahmanna an siam dan a ni :

 Thawhtanni, Nilaini, Zirtawpni apianga tlan turte : 1. Vaiphei  - 6am -12Noon 2. Bobby & Joseph - 6am -12Noon 3. Vankal - 7am -1pm 4. Josua - 7am - 1pm 5. T.H Enterprise - 9am - 2pm 6. ZT. Lalnunziri - 9am - 2pm.

Thawhlehni,  Ningani, Inrinni apianga tlan turte: 1. Seph Seph - 6am -12Noon 2. Kim Kim - 6am -12 Noon 3. Varte - 7am -1pm 4. Zoval - 7am - 1pm 5. RCA - 9am - 3pm 6. RTL - 9am - 3pm

MAMIT VENGHLUN BRANCH YMA IN KANG TUARTE HNENAH TANPUINA A HLAN

 Tunhnaia Mamit khawchhunga kangmei tuar chhungkua pahnih te tanpuina  turin Mamit Venghlun Branch YMA chuan Pawisa fai an hlan

Tun hnaia In kang vanga vanduaina tawk Pi Lungtiawii Mamit Dinthar leh Pi R. Lalfakawmi Mamit Lungsirveng amite tanpuina tur hian Branch YMA pawisa neih bakah veng chhunga mi inphalte thawhkhawm atangin tanpuina hi an hlan a ni.

Mamit Venghlun Branch YMA hian Mi inphal te thawhkhawm Rs 21,000 a hmuh bak ah Branch sum atangin Rs 9,000, avaiin tanpuina Rs 30,000  a pe chuak a. Hmarveng lam leh Lungsir lama kangtuar te tanpui nan Rs 15,000 ve ve in an Branch YMA hruaitu te hnen ah hlan a ni.

Tanpuina sum thawh tu vengchhunga mi inphal te zawng zawng chungah Venghlun Branch YMA chuan lawmthu a sawi tak meuh meuh a ni.

CHENG NUAI 80 ZET SENGA DIN MAMIT WOOD INDUSTRY HAWN A NI

 Cheng nuai 80 zet senga siam Mamit Wood Industry (Mamit Saw Mill) chu vawiin chhun dar 12:30 khan Upa H. Vanlalhruaia Mamit chuan hawngin Pathian hnenah a hlan.

Mamit Wood Industry hawngtu Upa H. Vanlalhruaia chuan mipui mamawh phuhrukna tur  mai ni lo, a chhehvel hnaivai a chengte tana hna siam belhtu tur Mamit Wood Industry (Mamit Saw Mill) hna thawk thei tura hawn a ni ta chu lawmawm a tih thu a sawi a, a neitu tana sumdawnna a nih bakah mipui tana malsawmna tur a nih hrereng chunga  hnathawk turin he Industry a hnathawktu zawng zawngte a chah.

Upa Hruaia chuan Pathian hriatpui ni tura Pathian hnena hlanna hun buatsaih a ni chu ropui a tih thu sawiin, Pathian hriatpui tak tak tlak ni tura hnathawk turin a chah a, tawngtaiin Pathian hnenah a hlan.

Mamit Wood Industry (Mamit Saw Mill) hi Er. C.L. Thangliana leh Pu C. Lalrinsanga (C.L.Filling Station) ten an din niin Mamit atanga 8Km a hla, Bualzau khua-ah din a ni.

He Industry hawnna puala hun buatsaiha thusawitu Pu C.L. Thangliana chuan Mizoram sawrkarin Wood Indystry din phalna a siam ang zuia phalna mumal tak nei chunga he Industry hi din a nih thu a sawi a, he Industry din tura a kawng a kual ve hle thu sawiin heng zawng zawng hi Mamit khua leh a chhehvel mipui tana tangkai leh chhawr nahawm a nih ngei a beisei thu a sawi.

Mamit Wood Industry (Mamit Saw Mill) hian sawrkarin dan a siam ang zui zelin thing chi hrang hrang an lei ang a, chung thing chu chi hrang hranga sawngbawl a nih hnuah State pawn leh State chhungah an hralh chhuak leh dawn a ni.

 

NGAIHSAK HLAWH LO ZIRNA IN TLABAL TAK A AWM

 Lehkha zir, thiamna kawngah rualelna a nasa a, kumtin Board  exam hrang hrang result a chhuah apiangin inhnialna a awm a, kan result neih ang angahte duhthusam tawk lo sawi tur a awm fo. Nu leh pa ten an fate lehkha thiam turin an beisei a, theih ang leh neih ang ang in sikul tha ni a an hriat an bawh mek. 

Sawrkar sikul aiin mimal enkawl sikulah thiamna tak tak a awm zawk nia ngaihna a lian hle a,sawrkar sikula thawk ten an enkawl naupangte chu dinhmunah leh zirna kawngah harsa zawk, thiam thei lo fuankhawm ang dawn dawn in an chhuah thin. Sawrkar sikul kan hmuh dan leh a nihna dik tak,kan ngaihsak tawk lohzia chu thawktute ngei tawngkam atang hian a chiang thin viau.

Sawrkarin a pum-pu-hluma a enkawl ni lo, thawktute hlawh a then a zar a tumsak sikul (GIA) an awm bawk a, hengte hlei hlei hian ngaihsak an hlawh tawk lohzia a lang chiang fo thin. Hetiang ang dinhmuna ding mek sikul zingah, Mamit High School - II pawh hi a tel mek.

Mamit High School - II hi khawtlang hruaitute leh mipui thahnemngaihna avangin kum 1993 ah din a ni a, he sikul atang hian kum tin pawl 10 zir chhuak an awm ve bawk a, he sikul atanga zirchhuak chhuanawm tak tak an awm bawk. Naupang, a chawmtu ngaihtuahin sikul changtlung tak ni thei tura ngaih a ni a, vawiina a dinhmun erawh kan hmuh leh hriat ang hi a ni. Tunah hian thawktu (Zirtirtu) pasarih awmin zirlai naupang 45 an awm mek a ni.

A building, kum 1993 a sak tawh, vawi khat chiah la repair hian naupang, nu leh pa a hip lo sa hrim hrim a,kal pelh a hlawh ang bawkin thuneitu lam atanga ngaihsak a hlawh tawk lo tih a chiang. Naupang tan pawha kal chakawma siam turin zirna a that leh that loh a pawimawh ber a, chumi rual chuan a hmelhmang lan dan pawh ngaihsak ve deuh chu a tul awm e.

He sikul, zirna leh a building hrim hrim hi tlem tala ngaih-pawimawh  a hun ve ta viau e. Building sawp-rawp lutuk tawha khawsak tir reng hi zirtirtute leh zialaite an khawngaihthlak viau mai. Tin, hetiang lutuka nitin an kal hian zirtirtu leh zirlaite rilru ah, mi phaklohna, midang aia hniam bika inhriatna a awm thei ang tih pawh a hlauhawm thei hial a ni.

Zir thiamna kawngah thahnem kan ngaia, rual kan awt ve tak tak a nih chuan, he School lam hi kan hawi nat ve deuh a ngai ta. Zirna kawnga rualawh vanga he school a din theihna tura sulsutute pawh an zahawm tak zet e.

 

SPORTS MINISTER IN THEIH TAWP CHHUAH A TUM THU MAMIT JT. VC LEH DFA HRUAITUTE A HRILH

 Vawiin khan Mamit Joint VC te leh Mamit District Football Association hruaitute chuan Pu Lalnghinglova Hmar, Sports & Youth Services Minister hmu in Mamit leh Mamit District mamawh hrang hrang an thlen a ni.

An thu thlen zingah hian Mamit GSA Playground-ah Phullem phah sak turin an ngen a. Mamit khawtlang hruaitute chuan Mamit khawpuiah Phullem phah a nih ve ngei theih nan Sports Minister chu an ngen a, Mizorama District khawpui dangah pawh an khelmualah phullem phah vek a nih tawh laia Mamitah phah ala ni ve lo chu pawi an tih thu leh a rang thei angbera phullem phah sak ve turin an ngen a ni.

Pu Lalropuia, Hony. Secretary Mamit District Football Association chuan Mamit District-a hmun thumah Phullen phah a ni tawh chu lawmawm a tih thu a sawi rual in, District Headquarters Mamit-ah ber Phullem phah ala nilo chu Football khel thin thalai tam tak in harsatna an tawh thin mai bakah Football lamah hmasawnna turah harsatna an tawh thu a sawi a. Mizoram huap Football intihsiakna pawh Mamit District in a thlen ve theih tawh loh thu leh District aiawh tur playerte pawh in Ground a danglam tawh avangin harsatna nasa tak an tawh thin thu Minister hnenah a sawi a ni.

Tin, heng bakah hian Luangpawla Residential Sports School siam mek chu chak leh zuala hnathawh a nih theih nan leh tangkai taka Mamit District naupang leh thalaiten an hman theih nana hmalak sak turin Minister hnenah hian an ngen nghal bawk a. Tin, Mamit Sports School a playground Fencing chu tun aia sang a siam sak turin an ngen bawk a ni.

Tin, hei bakah hian Mangkhawngdaia Futsal Ground leh Tennis Court siam zawh tawh chu thalaiten an hman tangkai vat theih nan a rang thei ang bera hawn sak turin an ngen nghal bawk a ni.

Pu Lalnghinglova Hmar, Sports Minister chuan Joint Village Council Mamit leh Mamit District Football Association hruaitute thil thlen chu a ngaihpawimawh thu a sawi a. A bik takin Mamit Khelmuala Phullem phah chungchang pawh Mizoram Football Association hruaitu a nihna ang pawh a a hriatthiam thu leh theih tawp chhuah a tum tur thu in a lo chhang a ni

THANGNANG KHAWN A HLAWK, TIN KHATAH RS 2000-2500 MAN LAI A CHHUAK THEI

 

Mamit leh a chhehvel hmun hrang hrangah Rawnal (Raw chi khat) a tam a, Rawnal tamin a ken tel Thangnang (Thlangdar chi khat) Mamit chehvelah a puang a, heng Thangnang hi khawng (man) in mihring eitura sawngbawl thin a ni a, a tak kan ro leh a hriak hralh a kal hle niin Thangnang khwng thinte chuan an sawi.

Tunlai hian Mamit khaw chhung hmun then khat leh a chhehvelah an awm a, District Jail tlang leh Vaisam tlang vel ami an khawng deuh ber niin a khawng thinte chuan an sawi a, zingah kalin chawhma chawhma chhungin tin 1 atanga tin 2 te In an thlenpui hman a ni.

Thangnang hi Sumah an deng sawm a, a hriak chu sawrin tui nen an chhuang so leh a, chu chu sarangah funin fun khat Rs 100/- in an hralh thin a, thangnang hum (a tak) tin khat atangin a hriak Rs 2000 atanga 2500 man vel lai a chhuak thei niin an sawi. A hriak an sawr tawhna hnu a vai (a tak) hi an phoro leh a, Vawk chaw atan a tha hle niin an sawi bawk.

Tunlai hian Mamit khawpui chhung veng thenkhatah Thangnang hriak zawrh lai leh a vai phoro hmuh tur a awm deuh reng a ni.

Thil tha hmang tangkai tura inbuatsaih

 Khawtlang hruaitute leh sawrkara mawhphurhna neitute (Official) thahnemngaihna leh tumruhna zarah, khawtlangin kan mamawh nia kan hriat, thlai leh chawhmeh vawn thatna tur (cold Storage) chu hman theih turin, reiloteah peihfel mai a ni dawn ta niin a lang a, a lawmawm hle a ni. Kan mamawhn nia kan hriat chhawp chhuahsak kan nih lai hian, a hmang tangkaitu tur ber nia ngaih, mipui lamin tihve tur kan nei dawn niin a lang.

Tuna an khawl bun mek hi a changkan fu hmel a, Artificial Intelligence Technology tih a ni a, a In (Store) pakhatah thlai chi hrang hrang vawm khawm teuh a nih pawhin  thlaiin lum leh vawt (temperature) an mamawh ang zelin a pe chhuak thei tura ngaih a ni. Tin, Agrico Innovation Company hian warranty an pe ang a, chumi hun chhunga siam ngai leh thawm ngai a awm a nih chuan sum sen belh awm loin a enkawlzui (Servicing) hna an thawk ang. A bak erawh keimahni kutzala tla tur a ni thung ang.

Hetiang taka khawl tha leh tangkai tur chhawp chhuahsak kan nih mek lai hian, a hman tangkaina tur, a dah that tur leh vawn that tur thlai emaw, chawhmeh emaw thahnem zawk thar chhuak ve tura vawiin atanga tan lak a ngai hle. Hmun dangah chuan an thlai thar chhuah a tam tham a, hmun danga pe chhuak zung zung tura harsatna a awm chang leh tul thilah dah thatnan an hmang a, a tangkai em em a ni. Keiniah erawh chuan khawpui zawk pana phurh chhuah tham thlai thar kan nei lem lo a, state dang atanga kan lakluh a tam zawk mah awm e.

Vawiina kan mitthla danah, bazara inzuar thin ten an chawhmeh khar chhawn a chhiat mai lohna tura an dah thatna tur a ni deuh mai thei a, a tha em em. Chutih rual chuan, kan khawtlang leh kan chhehvela kuthnathawktu tam zawk ten he khawl changkang tak hi chhawr tangkai ve thei tura tan lak a ngai.

A hman dan leh enkawl zui danah ruahmanna fel tak siam ngai tur thil niin a lang a, a hman hman, a phur phurin a khawih leh enkawl tum ngawt chi a ni lo mai thei. Khawtlang hruaitute hmalaknaa ngaihtuahna hmanna tur a nih hmel a, society emaw kal tlanga mawhphurhna inpek chi a ni mai thei e. Chutiang atan pawh chuan vawiin atanga ngaihtuahna lo sen lawk deuh a sual lo mai thei e.

Thil man tam, tha tak leh tangkai tak tur kan kawtkaia chhawp chhuah mek hi, hman tangkai tawk loh vanga hluihlawn mai a nih lohna turin, a neitu mipui lam kan lo inbuatsaih ve nghal a pawimawh tak zet a ni.

HIGHWAY NO 6 IN KHAW CHHUNG A LUH THEIH NAN JT.VC TEN MINISTER AN SAWIPUI

 Vawiin chhun dar 12 khan  Joint Village Council Mamit te chuan Pu Vanlalhlana, Minister PWD hmu in NH No. 6 Bairabi - Mamit (NH44A/108) chungchang an sawipui. Joint VC Mamit te chuan NH No. 6 Bairabi - Mamit chu a theih ang anga Mamit khawpui chhung tlawh tura an duh thu an thlen a. NH44A/108 in Mamit khawpui chhung a tlawh tawh loh avangin tuna NH No. 6 kal tur hi chu a theih ang anga Mamit khawpui chhung tlawh a kawngpui siam a nih theih nan Minister hnenah an thlen.

Joint VC Mamit te chuan Minister hnenah Mamit khawpui chu tun dinhmunah mihring an la tam loh avang leh hun lokal zel tur thlir pawh in Highway hian Bethel Veng thleng tal chu su tlang ngei turin an ngen a. Mamit khawpui chhung sut tlang a remchang lo a, a harsa a nih pawh in Bethel Kawn atanga tlak lamah kal in khawchhung hlat lo thei angberah kawng kalse mipuiten Highway kawngpui awlsam leh remchang taka an hman ve nghal theih nan leh Mamit khawpui zauh zelna atan pawh a tangkai ber an beisei thu Minister hnenah an thlen a ni. Minister chuan an thu thlen chu a ngaihpawimawh thu leh a rang thei ang bera hmalak a nih tur thu a lo hrilh.

Tin, Joint VC Mamit aiawhte chuan, PWD Minister hnenah hian NH44A/108 chungchang an thlen nghal a, kawngpui siam chhunzawm vat a nih theih nan hmalaksak turin an ngen a, khawthlang mipuite tana kawngpui pawimawh ber a nih avangin furpui thlen hma ngeia chak taka siamthat a nih theih nan hmalak sak turin an ngen bawk. Tin, Mamit Highway Junction (Luangpawl) - Mamit Field Veng thleng kawngpui siamthat leh tih zauh a nih theih nana rang taka hmalak sak turin an ngen bawk.

Pu Vanlalhlana, PWD Minister chuan Mamit khawtlang hruaituten Mamit leh Mamit District in kawngpui lama hmasawnna tura an hmalakna chu a ngaihpawimawh thu leh a theih ang anga chak taka hmalak sak a tum thu in a lo chhang a ni.

THLAI/CHAWHMEH VAWNTHATNA TUR MAY THLA CHHUNGA ZAWH BEISEI

   Mamit District thuthmun Mamita Bazar hlun ber, Mamit Bazarveng bazar bulah chawhmeh vawn thatna tur (Cold Storage), cheng nuai 192 senna tur building sak zawh a nih hnuin tunah hian chawhmeh vawn thatna hmun tur siam hna thawh mek a ni.

Mamit khawpui chhunga chawhmeh vawn thatna (Cold Storage) a awm theihna tur hian kum 2022 kum laihawl vel atang khan ngaihtuahna hman leh hmalakna kalpui a ni a, sawrkar laipui atanga sum hmuh a nih hnuin building hlui thiat a cold storage bunna tur hi thawh tan a ni a, building hlui (bazar shed) hi Ni 9/6/2023 khan vuak thiah tan a ni.

He cold Storage bunna tur hian sawrkar laipui PM  Gati Sakti Special Assiatance atangin Rs 192 lakhs (cheng nuai za sawmkua pahnih) hmuh a ni a, heng sum hmuhte hi building hlui thiahna, drain siamna, building thar sakna leh cold storage bunna tur leh thil dang dangah ruahman a ni.

Cold Stogare bunna tura hnathawh mekah hian DC Mamit chu Implementing agency niin  DHO Mamit chu Nodal Officer atan ruat a ni. He hnathawh mekah hian hnathawktu  Contractor pangngai hnenah hna pek a ni lo a, Mamit khawpui chhunga rorellai Party (MNF) worker thenkhat ten hna hrang hrang hi an inthawh sem a, zawhfel a nih hnuin cold storage bun hna hi  Hoticulture Department in Mizoram hmun hrang hranga an lo hman tawh thin company Agrico Innovation ten an thawk mek.

Tuna thawh mek Cold Storage bun hna hi Agrico Innovation hian April Ni 2, 2024 atang khan an thawk tan a, thlai/chawhmeh dahna tur In 15ftx10tt a zau pahnih sak zawh thaw khat a ni tawh a, wiring, solar plate installation leh a chhuat cement chhun hmabak lian zual a la ni. He hna hi May thla chhunga zawhfel tura tih a ni a, hnathawktu leh enkawltu Agrico Innovation Engineer Pu Kissan Rai chuan hun tiam chhunga an zawhfel vek hman beisei a nih thu Mamit Times a hrilh.

Chawhmeh/Thlai vawn thatna tura ruahman pahnihah hian thlai 15 Metric ton ve ve a dah theih ang a, Solar energy hmanga vawn tur niin solar hian darkar 8 chhung ni a hmuh that chuan darkar 48 vawng tha thei tura ngaih a ni a, chehmeh dah a zira temperature automatica set theih vek a ni bawk ang.

Agrico Innovation hian Generator 25KV 3 phase an dah tawh a, Deep Freezer 500ltrs dawng pali an dah tawh bawk.

Mamita Cold Storage a awm theihna tur hian Pu Lalthakima VCP Mamit Bazar veng chu sulsutu hmasa a ni.  Shri Umakant IFoS Jt. Secretary (WM) Gov't Of India, Central Prabhari Officer for Aspirational District in Kum 2022 July thla a Mamit a tlawh tum khan Cold Storage mamawh a nih thu hi Pu Thakima hian a lo thlen a, Jt. Secretary (WM) Gov't Of India, Central Prabhari Officer for Aspirational District chuan PM Gati Sakti Special Assistance atanga ngaihtuah theih a nih a beisei thu a sawi chu District Deputy Commissioner’s Office leh District Horticulture Office Mamit ten chak takin an bawhzui a, DPR siam niin Secretaries Meetingah Mamit District Bawrhsap Pu Lalnunhlua chuan Presentation a pe a, Interim approval hmuh a nih hnuin sawrkar laipui thuneitute nen Video Conferencing hmanga meeting neihah Pu Lalmalsawma Pachuau, State Prabhari/Secretary Planning & Orogramme Implementation Depatment chuan presentation a pe leh bawk.

He cold storage bunna turah hian Mizoram chhungah ngei pawh harsatna tam tak suttlang a nih hnuah PM Gati Sakti atangin sum hmuh a ni ta a ni.

 

AH & Vety Officer Mamit-in mipui zawmtur hriattirna a tichhuak

 Animal Husbandry & Veterinary Officer, Mamit chuan thuchhuah siamin ran hrileng laka kan ran vulh an him theihna tura mipui/ran vulhtu ten tihtur leh tihlohtur, mipui zawm ngei tur a tichhuak.

AH&Vety Officer, Mamit thuchhuahin a tarlan danin, ran hrileng, kan rama la awm ngai lo, lo awm tharte pawh hian min chenchilh reng tawh dawn tih sawiin hrileng laka kan ran vulh an himtheihna turin a neitu/vulhtu mihring kan fimkhur a ngai hle a ni a ti.

Heng a hnuaia tihtur leh tihlohtur te hi zawm ngei turin AH&Vety Officer, Mamit chuan mitin te a ngen a ni :

1. Vaccine/Hri danna a hun taka laktir thin tur

2. Ran vulh tur, A sa (Sarep), talh turte hrilenna khua/District atanga lakluh lohtur

3. Hri len laiin kan ran vulhna hmunah midang kaltir/tlawhtir loh tur a ni

4. Hri len laiin vawk chaw atan chaw ningnawi hmun dang atanga lak lohtur a ni

5. Chaw ningnawi chhuanin minute 20 tal chhuan so bawrh bawrh tur a ni

6. Hri len laii Vawk natna hrik dotu (Immunity) tichak turin vitamin tha pek tur a ni

7. Ran damlo an awmin rang taka enkawl vat tur a ni. Inkaichhawn theih chi a nih phei chuan rang taka dah hran vat tur a ni

8. ASF hri laka kan him theih nan kan vawk In leh a velte hypochloride/bleaching powder a theh tur a ni

9. Vawk thi an awmin AH&Vety, Deptt. ah hriattir vat tur a ni.

Vawk pul hri ven a tul

 

Kum kalta leh a hmasa lamah Mizoram chhunga Vawk pul hrileng (ASF) vangin Vawk vulhtu tam takin an vawk vulh an chan a, Vawk vulha eizawngte leh hmalam hun atana innghah nana hmangtu mi tam tak an mangang a, vawiin thlengin harsatna an la tawh phah a ni.

Khang hunah khan Vawk pul hri a darh zau zel lohna tur a nih beiseiin Vawk engemaw zat suat (tihhlum) an ni a, Vawk vulhtute hnena zangnadawmna awm thei tura beisei, vawiin thlenga pek loh engemaw zat an la awm. Vawk vulhtu, vawk suat sak ten zangnadawmna an hmuh theihna tura chak zawk leh na zawka umzui a tul hle.

Tun dinhmunah, Mizoram chhung hmun thenkhatah Vawk pul hri (ASF) a darh leh mek a, Vawk vulhtu ten vawk an chan leh mek a ni. Hrileng hi a tihrem dan  avang hle niin a lang. A pawimawh ber chu hmun dang atanga Vawk leh Vawksa atanga siam eitur lakluh loh a ni. Hetiang a nih avang hian sawrkar thuneitu ten  khapna thupek an tichhuak a, mipui lamin tha taka zawm a pawimawh. A bik takin, Sumdawnna leh eizawnna thil atana  Vawk leh Vawk sa atanga ei tur siam lalut thin te an insum theih a tul a ni. Mamit District leh Mamit khawpui chhungah Vawk pul avanga vawk vulhtuten manganna an tawrh nawn tawh lohna turin thuawih taka thupek zawm a tul.

Vawk vulh ve lote tan thil ho tak leh ngaihsak hlawh lem lo a ni mai thei. Mahse, a tuartu tan chuan thil lungchhiatthlak tak a tling tih hriattpui a tha. 

District dang leh hmun dang atangin Mamit District chhungah Vawk leh Vawksa atanga siam ang chi lalut an awm em (?) tih hi dan leh thupek kengkawhtu ten an vil ngun a ngai hle. Mahni hmasial leh duham falte avanga khawtlang mipuiin harsatna an tawk leh a nih chuan dan leh thupek kengkawhtute mawhphurhna hlen loh rah a tih theih hial ang.

Tin, mihring kan inchawhpawlhin kan hnih thum ve ta hle a, chhan hrang hrang avanga khualzin veivak kan thahnem hle tawh a ni. Khualzinte kan fimkhur a ngai hle. Zinna hmun leh kalkawngah Vawksa leh Vawksa atanga siam eitu ang chi ei lo tura insum theih a ngai. Chu chu midang tana malsawmna kan nih theihna kawng, Vawk hri darh zel tur ven kawnga kan tih theihpawimawh tak a ni.

Tuna kan tih theih awmchhun ni a lang chu  ‘In ven’ a ni tawp mai. A natna an hmuhna ram atang hian vawksa leh vawksa atanga siam ei tur (Frozen food) lakluh loh a him ber.

JAC TEN ZU LEH A NEITU NIA HRIAT AN MAN

Nimin Ni 7/5/2024 Thawhlehni tlai khan, Joint Action Committee, Mamit Venghlun te chu Ruihhlo vaiin an duty a, tualchhung siam zu (Local) thahnem tak leh a neitu ni a in chhal Vanlalhruaii (47) d/o Vanlalmawia Venghlun Mamit leh John Zodingliana (39) s/o Hunparvula Zawlnuam Bawrai Veng nia inchhalte  man a ni a,  heng zu leh a neitu ni a inchhal te hi Excise & Narcotics Department hnen ah hlan nghal a ni.

“Venghlun huam chhung ah ruihhlo a rem theih nan khawtlang mipui ten min thawhpui a, a zuar thin hria chuan JAC te hnen a, a ranglama report thin turin kan in ngen a ni” tiin Mamit Venghlun JAC chuan thuchhuah an siam.