LPS-Pro Fight Flyweight Quarter Final khelh turah Mamit tlangval Chhana’n chak ngei a inring

 LPS Pro-Fight khelh mekah Mamit tlangval C. Lalchhanhima S/o Lalropuia (L) Mamit Mizoveng chuan Flyweightah quarter final a luta, zanin hian Lalhruaitluanga Colney Bawngkawn, Aizawl nen an inhnek ang.

Venghlun Branch YMA Sports Sub-Committee Chairman Pu Runremmawia Khawlhring chuan an member, hetiang anga infiamna lama thui tak kal thei an nei hi chhuanawm an tih thu a sawi a, a tan tih theih leh thawh theih an nei loa, an tih theih ang tawk, a tana thilpek pekna an ruahmanah mi inphalte thilpek a lut zel chu lawmawm a tih thu sawiin Chhana puala thilpek bawm an dawh mekah thahnemngai taka pe zel turin mi inphalte an sawm tih a sawi bawk.

Zanina an inhnek tur chungchang Mamit Times zawhna chhangin Chhhana chuan a tumpui tur hi a huphurh bik loh thu a sawi a, harsatna dang a tawk a nih loh chuan, hnehna a chan ngei a beisei thu leh chutiang tura a inbuatsaihna a that tawk thute, a fitness a that tawk thute a sawi.
LPS Pro-fight a khelh mekah, amah tantu atana theih tawp chhuahtute zawng zawng chungah lawmthu a sawi a, a pual thilpek pek theihna ruahmantute leh phal taka thilpek petute chungah lawmthu a sawi a, a phu loh chawimawina a dawng nia a hriat thu a sawi bawk.

C. Lalchhanhima hi kum 2022 atang khan LPS-Pro-Fight ah hian a lo inlan ve tawh a, a duh ang leh tum ang thleng pha thin lo mahse beidawng mai loin nasa zawkin a inbuatsaih chhunzawm zel a, tunah hian Sete Boxing Academyah Boxing a zir mek a ni.

Zanina Chhana te inhnek hi Siamliana Hall, Charkawnah big screen hmanga en theih turin Venghlun Branch YMA Sports Sub-Committee chuan ruahmanna a siam a ni.

Mamit Venghlun tlangval, LPS Pro-fighta quarter final khel tur puala thilpek pe duhte tan Venghlun Branch YMA Sports Sub-Committee leh mi thahnemngai ten thilpek pek theihna an ruahmana, mi inphalte hnen atangin thilpek engemawzat a lut tawh a, a pe duh tan pek theih reng a la ni.