Thil tha hmang tangkai tura inbuatsaih

 Khawtlang hruaitute leh sawrkara mawhphurhna neitute (Official) thahnemngaihna leh tumruhna zarah, khawtlangin kan mamawh nia kan hriat, thlai leh chawhmeh vawn thatna tur (cold Storage) chu hman theih turin, reiloteah peihfel mai a ni dawn ta niin a lang a, a lawmawm hle a ni. Kan mamawhn nia kan hriat chhawp chhuahsak kan nih lai hian, a hmang tangkaitu tur ber nia ngaih, mipui lamin tihve tur kan nei dawn niin a lang.

Tuna an khawl bun mek hi a changkan fu hmel a, Artificial Intelligence Technology tih a ni a, a In (Store) pakhatah thlai chi hrang hrang vawm khawm teuh a nih pawhin  thlaiin lum leh vawt (temperature) an mamawh ang zelin a pe chhuak thei tura ngaih a ni. Tin, Agrico Innovation Company hian warranty an pe ang a, chumi hun chhunga siam ngai leh thawm ngai a awm a nih chuan sum sen belh awm loin a enkawlzui (Servicing) hna an thawk ang. A bak erawh keimahni kutzala tla tur a ni thung ang.

Hetiang taka khawl tha leh tangkai tur chhawp chhuahsak kan nih mek lai hian, a hman tangkaina tur, a dah that tur leh vawn that tur thlai emaw, chawhmeh emaw thahnem zawk thar chhuak ve tura vawiin atanga tan lak a ngai hle. Hmun dangah chuan an thlai thar chhuah a tam tham a, hmun danga pe chhuak zung zung tura harsatna a awm chang leh tul thilah dah thatnan an hmang a, a tangkai em em a ni. Keiniah erawh chuan khawpui zawk pana phurh chhuah tham thlai thar kan nei lem lo a, state dang atanga kan lakluh a tam zawk mah awm e.

Vawiina kan mitthla danah, bazara inzuar thin ten an chawhmeh khar chhawn a chhiat mai lohna tura an dah thatna tur a ni deuh mai thei a, a tha em em. Chutih rual chuan, kan khawtlang leh kan chhehvela kuthnathawktu tam zawk ten he khawl changkang tak hi chhawr tangkai ve thei tura tan lak a ngai.

A hman dan leh enkawl zui danah ruahmanna fel tak siam ngai tur thil niin a lang a, a hman hman, a phur phurin a khawih leh enkawl tum ngawt chi a ni lo mai thei. Khawtlang hruaitute hmalaknaa ngaihtuahna hmanna tur a nih hmel a, society emaw kal tlanga mawhphurhna inpek chi a ni mai thei e. Chutiang atan pawh chuan vawiin atanga ngaihtuahna lo sen lawk deuh a sual lo mai thei e.

Thil man tam, tha tak leh tangkai tak tur kan kawtkaia chhawp chhuah mek hi, hman tangkai tawk loh vanga hluihlawn mai a nih lohna turin, a neitu mipui lam kan lo inbuatsaih ve nghal a pawimawh tak zet a ni.