LUI DUNG THENFAI LEH TUI HNA HUMHALH

 Mizo Upa chuan “ mi pakhat a zun chuan midang an zung ve a, mi pakhatin tui a in chuan midangin an in ve nghal” an ti thin a, hei hian Mizote hi thiil intihhmuh awlsam tak, a tha lam a ni emaw, a chhe lamah pawh kaihhruai nuam tak kan nihzia a tilang chiang hle awm e.

Mizoram hmun hrang hrangah, Pawl hrang hrangin hmalakna lian tham tak tak kalpuiin luidung a hnawmhnawk awm thei ang anga thenfai hna an thawk chho mek a, kan ram hruaitu lu kan Chief Minister leh kan Ministerte hial pawh an thawk chhuak ve ta lawp lawp a nih hi. Hei hian kan luidungte an tawp zia leh kan tui a thianghlim tawk lohzia a tilang a, luia cheng nungchate tan chauh ni lo, mihring tan pawha himlo leh hrisello a nih avangin theih ang anga luidung thenfai hnathawh a tul tihna mipui thinlungah a lian chho zel a, hmun hrang hrangah helam hawi hmalakna hmuh leh hriattur a awm ta. Thil lawmawm tak a ni.

A tha lam zawng, mipui nawlpui, khawtlang tana tha tura hmalakna intihhmuh kawnga mi ke pen anga ke pen ve thei zirna In kan nei hi a hlu hle. Midang pawhin entawna, hetiang ang leh thil dangah pawh hmalakna kalpui chhoh zel atan a tha. Kan chhehvel lui dung khawi lai mai pawh hi a hnawk niai-nuai hle turah ngai ila, a sual lutuk loin a rinawm. Heng hnawk hi anmahnia lo awm ve tawp nilo in, mihring ten kan siam, kan tihhnawk a nih avangin mitin in bawlhhlawh thehthang danah zirtur kan la ngah em em tih a lang a, kawr remchang apiang bawlhhlawh paihna hmun emaw kan tih thinna rilru hi kan than san theihna tura inzirtirna pawh uar zawka kalpui a tul awm e.

He lam hawia hmalakna kan intihhmuha, sulsutu kan nei dawn a nih rau rau chuan, Mamit khawpui tuitlan - Lahmun lui leh Kurung Lui hnar lam te hi ngaihpawimawhah neih hmasa ila, a rah chhuah hlawkna leh hriselna mipuiin chawp leh chilhin kan tel nghal thei ang. Tin, he lam hawia hmalakna kalpui thei, pawl emaw, zirlai emaw, thianho emaw an awm a nih chuan sawrkar departmenta mawhphurhna neitute pawh hian ngaihven sela, mahni duhdan leh thiam ang anga kal darh satliah ngawt loin, thawhhona fel tak leh inkaihhruaina mumal tak neia tanho theih a duhawm. Chutiang tur chuan kan sawrkar department - a bik takin WATSAN emaw, UD&PA  lam emaw hian ngaihtuahna hmangin ruahmanna tha zawk kalpui thei se a duhawm hle a ni.

Tin, pawimawh em em bawk chu hei hi a ni : Mizo mipuite tui inchuha kan inhmuhmawh hun lo thleng tur kum kan pawh sei theihna tura tuihna humhalh leh siambelh kawnga tan lak a tul tak zet. Kum tin tlang ram Lo neih bansan a huan nghet neih a that zawkna leh hlawkna kan inzirtira, kan ramah hei hian zawm a hlawh em em. Kan lui hnar ram chhunga thing leh mau hmun vat chereua, tui hna ham khawmtu tam tak kan tihrem hian kan tuihna a titlem tih hi huan nghet neitu ten kan pawm ngam a ngai. Engkim hi inbuk tawk ngai a ni a, eizawnna leh sum hmuhna tura hmalakna kan bawh nat vak laia mihring mamawh leh sik leh sa chhe zel ven kawnga tangkai tak tak kan hlamchhiah si chuan, kan tumna leh kan hmachhawp lian pui pui pawh engmah loah a chang thei tih kan hriat tel ve a tha awm e.

Chuvangin, huan nghet zau tak tak kan siamna hmunah tui hna chhekkhawlna lam ngaipawimawh tel ila, a thlawna ruah vantla kan dawn luang ral puat tur lo chhekkhawl thei thil hrang hrang siam kawnga hmalakna kalpui leh midang zirtirtu, kawhhmuhtu ni tura tan lak a hun em em a ni. Chhung tinte van ruahtui chhekkhawl a tulna kan inzirtir uar ang bawkin huan lama ruahtui chhekkhawl kawnga inzirtirna kan mamawh ta hle.

Hmasawnna hnathawh kawngah, kan hma lam hun kum 20/30 thlir phak a ngai kan ti fo a, helam kawngah pawh hian kum tam tak thlir chunga vawiin atanga hmalakna kalpui a hun em em a ni.