Hmasawn zawnga ke pen

 Mamit District chhung leh Mamit khawpui chhunga chengte hmasawnna turin hna lian tak tak thawh a lo ni tawh a, hmachhawp tam tak a awm mek bawk. Heng hmasawna hnathawh hrang hrangte hi tlawmngai pawl anga vil leh ven ngai lo tura ngaih a nih laiin, Mizoram pum ang pawhin hnathawh vil loh leh ven loh a nih vanga hna chhe tak tak hnutchhiah a tam em em a, a mak hle. Hei hian NGOs te an buai lohna turah a buaitir a, NGOs hruaitute duh khawp lohna a awm  phah fo. Tha taka hna enkawl leh viltu tur sawrkar official lam mawhphurhna hlen loh vanga NGOs leh khawtlang mipui, khawtlang leh ram tana thil tha duh vanga ngaihtuahna senga veitute rilru nat vawng vawng chang a tam em em a ni.

Mamit khawpui chhunga NGOs hruaitute chuan hmasawnna hnathawh tur hmachhawp chungchangah sawrkar thuneitute an hmua, an duhna an thlen a, hei hi a hunlai tak ni pawhin a lang a, a lawmawm. Siamthat theih leh tihdanglam theih ala awm a nih chuan sawrkar thuneitute pawhin kan NGOs hruaitute duhdan hi an ngaipawimawh turah ngai ila a tha ang e.

Hmalakna kan kalpui danah, hun la lola awm turah helam hawia ke pen leh a ngai a nih chuan kan tihdan erawh kan thlak danglam deuh a tha mai thei e. Vawiina kan NGOs hruaituten sawrkar thuneitute hnena an thu thlen hi Pawl hrang hrang thutlukna aiin Pawl hrang hrang hruaitute thutlukna angah a ngaih theih awm e.

Thil pawimawh leh lian tham, khawtlang leh pawl hrang hrang huapa thutlukna siam ngai a awmin, pawl hruaitu bawrte thu ringawt lak hi a fel ber lo mai thei. Hun thawl zawk siam a, pawl hrang hrangten anmahni huang chhungah theuh an ngaihdan leh duhdan an sawikhawm hnua thutlukna an neihte, an pawl hruaitute theuhin sawihonaah an pulut tur niawm tak a nih laiin, a lu bawrah, mi tlemte ngaihdan atanga thutlukna kan siam mai thin nia lang hi nakin zelah chuan kan insiamthat a ngaihna tur niin a lang. Mipui huap emaw, Pawl hrang hrang huapa tanrualna turah, tanrualna tha kan neih theih loh phah fo niin a lang a, a pawi em em a ni.

Engpawh ni sela, a hun laia kan duhna leh tha kan tih dan sawrkar thuneitute hnena kan luhpui ve ta ruak ruak hi hmasawnna a ni hrim hrim a, kan duhnate a hlawhtlin ngei theihna tura ngaihven zui kawngah, chawlloa ngaihtuahna sen a ngai tih hria ila. “Kan lo ngaihtuah ang” an tih vanga thlamuang taka awm nghal ngawt theih a ni lo tih kan hriatreng a tha awm e.