Zirna In enkawltute siamthat hmasak an ngai

 MBSE in HSLC Exam 2024 result a tichhuak ah, Mizoram chhunga sawrkar sikul thahnem takah HSLC exam beitu Pass awm miah lo an awm leh ta a, hei hi thil thar a ni lo a, hun rei tak atanga sikul thenkhat dinhmun lo nih tawh thin dan a ni.

HSLC Exam beitu, pass awm miah lohna sikulte enzuia hmalak a nih tur thu School Education Department changtu Minister chuan Chanchinbumite hmaah a sawi chhuak a, a lawmawm hle. Awmze nei zawka hmalakna an kalpui thuai thuai a nghahhlelhawm hle a ni.

Heng zirna In, HSLC exam beitu pass awm miah lohna sikulte hi enge an dinhmun, eng ang harsatna nge an tawh tih ngun taka zirchian hmasak a tul ngeiin a rinawm a, chung zir chianna atanga sawrkar in a tihtur a tih loh emaw, a tihlohtur a tih emaw a awm a nih pawhin huaisen taka an siamthat ngam a tul ang. Sikul leh a thawktu awm ang angte thiam loh chantir tum ngawt leh thuneihna lek nghal ngawtna tur chi a nih hmel loh a ni.

Kan sawi fo tawh thin, sawrkar sikul mal ringawt ni lo, sikul enkawltu School Education department atang hian siamthat an ngai tih kan hmuhfiah a hun hle. Mizoram sawrkar hnuaia department zingah thawktu nghah ber pawl, sawrkar sum hmang tam berte zing ami an ni ang. Kum khata an sum hman ral leh zirlai thiamna paw tak tak paw chhuak theia an chher chhuah zat hi a inphu in kan hria em ? Ngaihtuah ngai a ni. Thawktu leh an enkawl an tam deuh avanga deldul tura inngaih ngawtna hi chhuanlam tling a ni hek lo. Chawm leh hrai, enkawl leh kaihhruai an ngah poh leh an thawk rim mai tur a ni ang. Sawrkar hnathawk zingah, Sakhuanna thil, Pawl leh Khawtlang thila mahni hnathawhna hmun chhuahsan tam berte hi School Education Department hnuaia thawkte hi an ni hial mai thei. An hnathawhna hi an rawngbawlna a ni tih hrechiang tur khawpa chunglam atanga inenkawlna khawng zawk an mamawh pawh a ni mahna.

Mizoram chhunga Elementary School leh Secondary Schoolah zirtirtu indaih tak tia sawitur an vang viau mai thei. Chutiang bawkin zirtirtu leh zirna In enkawl kawnga mawhphurtu District Office leh Sub-Division Office ah thawktu pangngai awm mumal lohna a tam hle bawk ang. Hengte hi siamthat ngai hmasa a ni. Pisa lama thawk tura zirtirtu pawh pen an tam lutuk te hi vei a hun a, Aikal la kan buaipui aia nasaa buaipui tur a ni.  Pisa lama thawktu awm mang lo vanga zirna In in a tuar dan hi hmu thiam ila, hei hi kan zirna In te harsatna tawh lian tak, zirlaite hmakhua tichhe thei a ni tih hriat a hun.

Vawiina kan District Education Office leh Sub-Division Officea  thawktu dinhmun thlir ila, zirtirtu thu zawng zawng hi zirtirna an pekna tur hmunah dah let vek ni sela, kan Zirna In enkawltu Pisa hi an buai hle ang. Chutiang chiah chuan zirtirtu pawh pen hi zirna In in a tuar hle a ni.

Pawl sawm leh Pawl sawm pahnih Exam result a chhuah a pianga sawrkar Zirna In thenkhat ten demrawn an hlawh fo thin hi a reh theihna turin, a chunglam, anmahni enkawltu deparment hi siamthat leh thuam chak a tul tak zet e.