3-MAMIT (ST) A/C MLALADs FUND BIALTU MLA HNENAH RS 5,50,700/- PEK CHHUAH A NI

 Kum 2024-2025 sawrkar kum kal mek, April - June (1st quarter) ah 3-Mamit ((ST) A/C MLALADs fund atangin Rs 5,50,700/- pek chhuah a ni tawh.

Right to Information Act 2005 hmanga zawhna, State Public Information Officer, DC OfficeMamitin a chhannaa tarlan a nih danin Kum 2024-2025 sawrkar kum kal mek, April - June 2024 (1st quarters) chhungin 3-Mamit (ST) A/C MLA LADs fund Rs 5,50,700/- pek chhuah a ni tawh.

RTI dan hmanga Zawhna chhanna a tarlan a nih danin lehkha No B. 11011/28/2023-DC(M)/Part-I hmangin Ni 14.06.2024 khan Er. H. Lalzirliana, MLA 3-Mamit  (ST) A/C hnenah MLALADs fund atangin Rs 5,50,700/- pek chhuah a ni a, MLALADs fund hmanna nia tarlan hetiang a ni :
1. Purchase of Broiler Chicken
2. Purchase of foldable wheel chair
3. Purchase of G.I Sheet.

Govt. Mamit College ah Geography Subject zirtirtu a ba in chhawr mek a ni

 Kum 2020 November thla atanga 3-Mamit (ST) A/C MLALADs fund hmanga Govt. Mamit Collegea Geography zirtirtu rawih chu Kum 2023-2024 financial year tawp (March 2024) atang khan tihtawp a ni.

3-Mamit (ST) A/C vawngtu MLA Er. H. Lalzirliana chuan Govt. Mamit Collegeah Geography subject zirna a awm theihna turin nasa takin hma a la a, Kum 2020 November thla atanga July 2023 thleng khan GMC ah Geography zirtirtu pahnih a fund atangin a ruai a, August 2023 atanga March 2024 thleng khan pakhat rawih chhunzawm a ni.

Kum 2024-2025 sawrkar kum thar atangin GMC a Geography zirtirtu pakhat  MLALADs fund hmanga chhawr chu tihtawp a lo ni leh ta a ni.

Kum 2024-2025 Academic Session tharah GMC a Geography zirtirtu rawih chhunzawm loh theih loh a nih vangin GMC thuneitute hmalaknain a thawk lai hi thawh chhunzawmtir a ni a, a lawmman tur hi GMC in a ngaihtuah tawh ang. 

Hemi chungchangah hian Principal GMC chuan “Geography subject zirna kalpui laklawh a nih tawh avangin tihtawp thut a rem tawh lo a, zirtirtu lawmman pawh GMC in a ngaihtuah a ngai a, tlawmngaia thawk chhunzawm tura kan ngen angin a la thawk chhunzawm rih phawt ang a, a lawmman tur pawh kan bat ral sak bik lo turah kan ngai” a ti.

MLALADs fund atanga GMC a Geography subject zirtirtu rawihna tihtawp a nih tak chhungchangah 3-Mamit (ST) A/C bialtu MLA Er. H. Lalzirliana chuan MLA fund hmanna tur thil tam tak a awm ve thu sawiin, GMC a Geography zirtirtu rawih chungchang chu  State sawrkarin a ngaihtuah ve mai tura a ngaih thu Mamit Times zawhna a chhang.

MAMIT KHAWPUI CHHUNGA VEC PARUK ZINGA PAKHAT HNENAH HNATHAWHNA TUR PEK AN NI

 MGNREGS hnuaia Material Component sum hmanga Mamit khawpui  chhunga hmasawnna hnathawhna turin hna hrang hrang sawm ruahman a ni a, hnathawhna tur sum hi pek chhan tan mek a ni.

MGNREGS hnuaiah hian mipui (Job Card neitute) inhlawhna bakah hmasawnna hnathawhna turin Material Component hming vuahin sum ruahman thin a ni a, chu chu Programme Office atanga thawh tur-District Employment Council (DEC), Block Office atanga thawh tur Block Employment Council (BEC) leh khawtlang mipui Job Card neitu ten an thlan chhuah Village Employment Council (VEC) ten an thawhna turin fel taka then hran a ni.
Sawrkar kumthar 2024-2025 (April 2024 - March 2025) intan phat 1st April 2024 atanga 26th July 2024 thlenga MGNREGS hnuaia MC atanga Mamit khawpui chhunga hna-thawh tura ruahman, RTI dan hmanga zawhna chhanna atanga a lan dan hetiang hi a ni :
 

District Employment Council hnathawh tur :
1. Renovation & Maintenance of Panchayat Bhavan-cum-YMA Hall Lungsir, New Mamit sum la pek chhuah loh.
2. Construction of breast wall near DPO Residence, Hmar veng Rs 32,000 pek chhuah tawh niin hna thawh mek a ni.
3. Renovation and Maintenence of Community pond, Luangpawl sum la pek chhuah loh.
4. Repairs of Water Tanky at Zaimawii Bazar veng sum la pek chhuah loh.
5. Construction of Goat shelter for Lalzarliana Chhimveng sum la pek chhuah loh.
 

Block Employment Council hnathawh tur :
1. Renovation & Maintenance of Panchayat Room-cum-PO Room Rs 1,31,265 pek chhuah tawh niin hna thawh mek a ni.
 

Village Employment Council hnathawh tur :
1. Construction of Mitimuram road Suang-kuang kawng to Tuihnaai zau kawng, Hmarveng Rs 1,31,265 pek chhuah tawh niin hna tan a la ni lo.
2. Recharge Pit for Zothanmawii huan (Individual), Hmarveng Rs 38,400 pek chhuah tawh niin hna tan a la ni lo.
3. Construction of Poultry shelter for Dingdi SHG Hmarveng Rs 32,6220 pek chhuah tawh niin hna tan a la ni lo.
4. Construction of Check Dam near Thlanmual No 2 for Hmarveng ALF Multipurpose Co-Operative Society, Hmarveng Rs 35,020 pek chhuah tawh niin hna tan a la ni lo.

NH No 6 Bairabi - Mamit hmalakna a la thui lo, Kawngpui awmsa siamthat hnathawh a khaihlak

 Bairabi lam atanga Mamit thlenga kal tur, (NH No 6 peng pakhat) hnathawhna tura hmalaknaah hmasawnna ropui tak sawi theih a la awm rih lo a, hna tul  hmasa thawh ngai thawh zawh a nih hnua ruahmanna kimchang (final DPR) MoRTH a theh luh theih hun tur pawh chiang taka sawi theih a la ni lo a, October 2024 velah chuan theh luh hman beisei a nih thu SDO MPWD Highway Division I chuan a sawi.

Tun dinhmunah Mamit leh Bairabi inkar kawngpui a chhe leh hle tawh a, lirthei kal ten harsatna an tawk nasa hle a ni. MoRTH hnuai atanga Short Term Maintainance Contract (STMC) hmanga kawng awm sa thawm that hna, NIDHI Creative Infrastructure Pvt. Ltd hminga Mizoram PWD Highway Division ten an thawh mek pawh fur ruahtui tla tam avangin harsatna an tawk mek bawk.
STMC hmanga hnathawh mek chungchanga SDO Highway Division I hnen atanga Mamit Times thudawn danin, kawng siam hnathawhna tura sum ruahman Rs 433 lakhs atangin April 2024 atana sum hman phal,  Rs 29 lakhs (cheng nuai sawmhnih pakua) hmuh a ni tawh a, heng atang hian GST, Labour Cess etc  pawh thlak (cut) a nih hnua hnathawhna tur sum beisei theih zat hi cheng nuai sawmhnih (Rs 20lakhs) vel awrh a ni thung. Hetihlai hian, sum hmuh hmaa hnathawhna atana lo hman tawh pawisa bat sa hi cheng nuai sawmnga dawn a awm thung.

Fur ruahtui tla avangin lung lakna (quarry) neituten lung (boulder) phurh chhuah kawngah harsatna an tawk a, hemi avang hian kawng siamna tur boulder hmuh theih a nih loh vangin hnathawh mumal theih a nih loh thu Pu Hlutea SDO Highway Division I chuan a sawi a,  lung an hmuh theih hunah pangngai taka hna tan leh theih beisei a nih thu a sawi. Mamit leh Bairabi inkara kawngpui chhe zual laite hi a nih dan tur anga  la khawih ve hman loh lai  an nih deuh vek thu a sawi bawk.

KAWNG CHHE LUTUK VANGA HARSATNA THLENG THIN SUTKIAN DAN NGAIHTUAH

 National Highway 44A/108 in a ken, Darlak leh Tuidam inkar kawngpui chhe lutuk avanga lithei kal vel ten harsatna nasa tak an tawh thin sutkian a nih theihna tura hmalak dan tur sawihoin nimin khan Superintendent of Police, Mamit District leh MJA Mamit District memberte an thukhawm.

National Highway 44A/108 ken, kawnghlui tia sawi tak, chhuk chho leh nal tak, kawng thar in awmzia a neih loh vanga zawh loh theih ni silo, Darlak leh Tuidam inkara lirthei tlan ten harsatna an tawh thin sutkian a nih theihna tura ruahmanna awm leh lirthei leh mihring tana him zawk tura hmalakna kalpui a nih theihna turin nimin chawhma dar 11 khan Pi Lalthangpuii Pulamte, Superintendent of Police, Mamit District chu MJA Mamit District member ten a pisa ah an kawm a, SP hi Addl. SP Pu Lalpianthanga leh SDPO Pu Zosangliana ten an tawiawm a ni.

He inkawmhona-ah hian MJA Mamit District memberte chuan Darlak leh Tuidam inkara lirthei chet vel dan ruahmanna awm sa - zing dar 5 atanga chawhnu dar 3 thlenga Darlak lam atanga lirthei lian (HMV leh MMV) kal phalloh leh tlai dar 3 hnu lama Tuidam lam atanga heng lirthei kal phalloh thupek chhuah tawh chuan zawm a hlawh lem lo nia an hriatthute, hei hi dan leh thupek kengkawhtu, vengtu (duty) an awm loh vang nia an hriat thute an sawi a, helai kawnga lirthei kalte himna tur hian darkar rei lutuk lo huama chhuk zawng leh chho zawnga lirthei eng chi pawh inkal chhawk (one way) tura ruahmanna siam nise lirthei inhnawk vanga lirthei tangkhang tam tak awm thin a sutkian theih an beisei thu leh chetsualna thleng mai thei lakah pawh a him zawk an beisei thu an sawi.

Pi Lalthangpuii Pulamte, SP Mamit chuan tuna ruahmanna an siam tawh chu ngawrh taka duty dah chunga tunkar chhung enzui/enchhin phawt nise, harsatna awm thinte sutkian nan a la tha tawk lo a nih chuan ngaihtuahna thar hmanga insiamrem zel theih a nih thu a sawi.

Hetihlai hian Police force lam ngawrh taka duty ( darkar 24 chhung) turin mihring indaih tawk loh vang leh a ken tel thin hrang hrangah harsatna an tawk ve tih a sawi a, mipui himna tura ngaihtuahna nasa tak hmang chunga ruahmanna awm tawhte zawm tum theuh turin mitin an ngen tih a sawi bawk.

STATE SAWRKAR-IN A TUM VE TUR PAWISA A LA PEK CHHUAH LOH VANGIN ZANGNADAWMNA PEK CHHUAH A LA NI LO

 Kum 2022 a Vawk pul hri (ASF) leng vanga vawk suat neitute hnena zangnadawmna pek tur sawrkar laipuiin a tum tur cheng nuai 131.66 (1st Instalment)  pek chhuah a ni tawh a, Mizoram State sawrkarin a tum ve tur cheng nuai 131.66 pek chhuah a la nih loh vangin Zangnadawmna hi sem theih a la ni lo.

Right to Information Act 2005 hmanga zawhna chhanna, Ni 11/7/20224a SPIO, Animal Husbandry & Veterinary, Mizoram Aizawl in lehkha No A. 46012/1/2024-DTE(AH&V)/EST hmanga chhanna a pek chhuah a tarlana nih danin Kum 2022 a Vawk pul hri avanga Vawk suat neitute hnena zangnadawmna pek chhuah theih a la nih loh thu tarlan a ni.

RTI chhanna ah hian, Kum 2022 a Vawk suat neitute hnena zangnadawmna pek tur, sawrkar laipuiin a tum tur Rs 526.63 lakh atangin a thawh khatna (1st Instalment) Rs 131.66 lakhs (25%) chu State sawrkarin a dawng fel tawh a, State sawrkarin a tum ve tur Rs 131.99 lakhs chu expenditure sanction sawrkarah dil mek a nih thuin zawhna hi chhan a ni.

State sawrkarin pawisa a tum ve tur hi a pek chhuah fel huna kum 2022 a Vawk suat neitute dawn tur zangnadawmna thawh khatna (1st Instalment @ 25%) chu a tahtawla pek chhuah theih beisei a nih thu RTI chhannaah chuan tarlan a ni bawk

Kum 2023 April thla a RTI chhanna a tarlan a nih danin Kum 2022a Vawk hri (ASF) leng avang khan Mamit khawpui chhungah ringawt Vawk 825 suat a ni a, zangnadawmna pek chhuah ngai zat hi Rs 66,62,600/- (nuai sawmrukparuk singruksanghnih zaruk) anga chhut a ni.
 

LEI TAWLH HUAM CHINA CHENGTE HMUN HIM LAMA INSAWN CHHUAK TURA HRIATTIR AN NI

Pu V.L. Remliana, Deputy Commisioner Mamit District, Chairman District Disaster Management Committee ni bawk chuan nimin Ni 2/7/2024 khan thuchhuah siamin Mamit Hmarveng Lei tlakhniamna huam chhunga chengte chu hmun hyim lama insawn turin a hriattir. 

DC& Chairman DDMC in lehkha No R. 24012/13/2022-DC(M)/DM&R-II Dated 2nd/July/2024 hmanga hriattirna a tih chhuahah chuan Pu H. Lalthanmawia leh Pu H. Lalnuntharate In inkara Lei tlahniam chu a hmunah inspection Team ten an enfiah tawh thu tarlan a ni a, fur ruahtui tlak hun a nih vangin helai lei tlahniam hi a chet zel a hlauhawm a, mihring tana himlo thei a nih avangin Section 30 (2) (iii) of the Disaster Management Act 2005 in thuneihna a pek angin Pu H. Lalthanmawia leh Pu H. Lalnunthara te In inkara cheng zawng zawngte chu an chenna hmun chhuahsana hmun him lama insawn chhuak turin a hriattir a ni.
 

District thuthmuna thuneitu fuan khawm

 Hun danga kan la hriat ngai reng reng loh sawrkar enkawl kawnga mawhphurhna sang tak nei te thutkhawm (Council of Ministers Meeting) chu Aizawl khawpui pawn, Lunglei khawpuiah nghah a ni a, hei hian Political Party anga inbeihna nasa tak a chawk chhuak a, a rawttu ten thulh phah an tum bik lo a, ruahmanna fel tak nena kaltlangpui a ni.

Hetiang ang thil thar kan hmuh hian thatna leh tangkaina a nei thei hle dawn niin a lang a, sawrkar sum tam tak senga hlatekhua an pan khawm hi hlimhlawp emaw, huau huau emaw ang lekah tawp lo sela, sum senral hu tawk ang tal Lunglei District hian hmasawnna hmuh phah mawlh teh se.

 Ministers leh sawrkar mi pawimawh Lunglei khawpuia fuankhawm ten nimin lama an hmalakna hrang hrang hmuh leh hriat hian a tha lam kawng zawh tura hmalakna pawimawh tak leh tul tak nia ngaih theih a ni. Chutiang ang a nih lai chuan, ram pum huap ngaihtuah lemlo a ram bial khat chauh emaw, District khat chauh emaw tana duhsakna hleihluak lantirna ang chauha kan hmang a nih erawh chuan thuneitute hian demrawn an hlawh hle thung ang.

District thuthmuna sawrkar mipawimawh fuankhawm ten anmahni chanpual zawn theuha sawrkar hmalakna an enzui leh hmalakna kalpui zel dan tur a hmun ngeia an hmu leh ngaihtuahna an hmang hian hmasawnna hnathawh kawngah nasa takin kawngro a su ang tih a rinawm. District hrang hrang ten hmasawnna kawngah rualkhai taka ke an pen theihna turin ngaihsak bik leh ngaihthah bik nei hauh loin District thutmun hrang hrangah hetiang hi tih chhunzawm zel law law sela,ram mipuiin kan chhawr tangkai thei ang. Tihbik leh duh bikna neia an tawp san leh si a nih chuan *“Enga ti bik nge?”* tih zawhna a awm ang a, chu chuan District inhmuhmawhna leh inepna, mimal tinzawn bik neia inpuhmawhna a thlen thei ang.

Sawrkar mi pawimawh rual ten a huhoa District chhunga sawrkar hmalakna hrang hrang a hmuna an tlawh, hmalakna chhunzawm dan tur sawiho leh ngaihtuahna sen hi district dang pawhin an mamwh em em vek a ni. Ang khat pata kalpui theih a nih chuan hetiang thil thar hi ram tan a hlu thei hle ang a, sawrkar insenso man a awm hle ang.

MAMIT LEH DAPCHHUAH INKARAH NH 44A/108 A PING, THENFAI CHHUNG A REI RIN A NI

 

Mamit leh Aizawl inkalpawhna kawngpui NH 44A/108 pawh Mamit atanga Dapchhuah thlen hmaah hmunhmun tam takah  leiminin a hnawh ping.

Mamit leh Aizawl inkar kawngpui NH 44A/108 chu Mamit atanga Dapchuah thlen hmaah leimin avangin hmun tam takah a ping a, kawng thenfai hna hi tukin atang khan MPWD Highway Division ten an thawk nghal a, lirthei kaltlang theihtur chuan hun a duh deuh dawn niin thawktute hnen atanga Mamit Times thudawnna chuan a sawi.

Kan thudawnnain a sawi danin leiminin kawng a hnawh hi a tam hle a, a lian tham deuh, hna hautak deuh tur chu hmun sarih velah a awm a ni. Kawng pinna hmun hi Mamit leh Dapchhuah inkarah vek a ni a, Dapchhuah lam atang leh Mamit lam atangin khawl hmanga thenfai hna thawh nghal a ni chungin hun erawh a duh rei dawn nia ngaih a ni.

MAMIT HMARVENGA CHHUNGKAW ENGEMAW ZAT CHENNA HUAM CHHUNGAH LEI A TAWLH

 

Tun laia fur ruahtui tla tam zual avangin Mizoram hmun hrang hrangah Leimin avanga chhiatna thleng sawi tur a awm a, Mamit khawpui chhungah pawh Leimin avanga harsatna lian zawk thleng thei dinhmuna ding mek chhungkaw engemawzat an awm.

Kar hnih/thum liam ta atanga Mamit Vengthar huam chhunga Lei che chu nizan khan tan tham tak a tawlh a, a chhak lam leh thlang lama awm chhungkaw engemawzat dinhmun hlauhawm takah an awm mek. Lei chet nasatna leh nizan lama a tawlhna hmun DTO Office ep chhuah lam, chhungkaw chenna In panga vel huam chhungah a ni a, nizan dar 1-2 vel khan helai lei che hi tawlhin a thlang lama kawng kal (Ring Road) a hnawh ping vek a ni.

Leiminin kawng a hnawh hi tukin khan PWD thuneituten a hmunah an tlawh nghal a, awmze nei zawk leh a chhak lam tla zel tur veng chunga thenfai a nih theih tur ngaihtuah nghal a ni.

Helai lei chetna huam chin chhak lama cheng   In 3 luah chhungkaw 8 awmte hi kar kalta khan an insuan chhuak tawh a, Inrinni kalta khan Assam Type In pakhat (Pu H. Thanmawia In) chu thiah a lo ni tawh a ni. Thuneitute thurawn angin helai bawra cheng nunau leh chakvak tawh lote chu zan lamah pawh hmun him lamah an lo riak chhuak tawh bawk.