PAWI KHAWIHNA THLEN THINNA HMUN SDPO MAMIT-IN A TLAWH 

 

Mamit leh Phaizau inkar, Saitlan rama huan neitute ten tun hnaia harsatna an tawh thin, huan thlai himlo leh Thlam chhunga bungraw chi hrang hrang bo thin nia an sawi, social media lama darh chungchangah vawiin Ni 28/6/2024 khan Pu Zosangliana SDPO Mamit chuan Saitlan zau hi a tlawh a, Saitlan zaua huan neitute nen inkawm in pawi khawihna thlen thin dan leh pawi khawihtu man chhuah an nih theihna tura hmalak dan tur an sawiho.

Pu Zosangliana SDPO Mamit chuan helai zaua pawi khawihna thleng thin chu Police chuan pawi an tih thu leh an ngaihven reng thu a sawi a, tun maiah pawikhawih thintute hi hriat chhuah mai theih nilo mahsela an thlithlai reng tih a sawi a, huan/lo neitute pawh hetiang titu nia rinhlelh an nei a nih chuan rang taka Police hnena hriattir turin a chah.

Helai zaua huan neitute chuan an harsatna tawh thin hriatpuia Mamit Police thuneituten a hmun ngeia an tlawh chu lawmawm an tih thu leh thlamuan thlak an tih thu an sawi a, an theihna zawnah Police te hmalakna tichak tura tawiawm zel an inhuam thu an sawi.

Hemi hnu hian Pu Zosangliana SDPO Mamit chuan Phaizau khua tlawhin Village Defence Party (VDP) hruaitute a kawm a, Sualna chi hrang hrang laka Phaizau khua a him theihna tura hmalak dan tur leh thawhhona tur hrang hrangte an sawiho a ni.

 

LEIMIN IN IN A HNAWL/CHIMPUI, RUANG PAHNIH HMUH A NI TAWH

 Nizan (Thawhlehni zan) dar 12 vela ruahsur nasa avanga khan Khantlang khuaah Leimin in In pakhat a hnawl/chimpui a, he thu buatsaih lai thleng hian chhungkaw pa ber Sanjiv Chakma S/o Bagyo Charan Chakma (32) leh  Handori Chakma (12) chu an ruang hmuh a ni tawh a, Rinko Chakma kum thum mi erawh chin hriat a la ni lo a, khawtlangin an zawng mek a ni.

Lei minin a hnawl tak Inah hian mi  panga an awm a, nu ber Monju Rani Chakma (28) leh  Kripa Mala Chakma (10) te an him a, hliam erawh an nei niin Khantlang VC Secretary chuan a sawi.

 

THAWHHONA THUTHLUNG BAWHZUIIN SYMA LEH SAMAGRA THUNEITUTE AN THUKHAWM

 Central YMA leh Samagra Shiksha Mizoram ten Mizoram ah zirna hmasawnna tur kawnga thawh hona tur MoU an lo ziah angin Mamit District ah pawh Vidyanjali ( School Volunteer Programme) chungchangah District Level Orientation Programme hman a ni.

He hun hi BRC Hall Mamit-ah Sub Hqrs YMA hruaitute leh branch hrang hrang atangin mi 30 chuangten hun an hmang a. Online mode-in District chhunga YMA Branch hrang hranga mi 42 ten he programme hi an lo chhim bawk. 

Pu Laldingliana DEO/DPC te, Mamit Sub Hqrs YMA President Pu Vanlalchhuanga Chhangte leh Secretary Pu H.Lalnunfela ten thu an sawi. State Level a YMA leh Samagra Shiksha thawh hona MoU chu theih tawpa tih hlawhtlin zel an tum thu leh khawtlang mipuite nen zirna lamah hmasawn tura tanrual a tul thu an sawi.

Vidyanjali hi school mamawhte, a hmanrua (kind) emaw thil tihsak (service) hmang emawa community/individual ten an thawhna tur programme a ni a. Vidyanjali hlawhtlin theihna tura YMA leh Samagra Shiksha lam thawh dun dan tur ruahman na duan lawk ang angte leh Vidyanjali Portal hman dan tur chipchiar takin Pu H.Lalrosanga, Dy.DPC & District Nodal Officer chuan Power Point Presentation hmangin zirtirna a pe a. YMA te nen thawh hona tha leh midangte tana entawn tlak taka ke pen ho  zel a beisei thu a sawi.

W. PHAILENG ATANGA ENG LAKLUHNA THINGIN VAW CHHIA

W. Phaileng atanga Mamita Kawlphetha peka hrui chu mi then khat thing kitin W. Phaileng khaw bulah an vuak tir avangin a ban pali a thlep/tlu a, W. Phaileng lam atangin Kawlphetha lakluh theih a ni rih lo.
 

 Hetianga line a chhia tih hi nimin lam khan hmuh/hriat a ni a, siamthat hna thawk tura ngawrh taka hmalak nghal niin nimin vek khan a ban phunna tur laih nghal a ni a, vawiinah P&E thawktuten ban phun that hna an thawk ang.
 

Line chhia siamthat tur hi a hautak tham deuh avangin vawiin lama thawh zawh theih a rinawm loh thu Pu Sangtea EE P&E Mamit chuan a sawi a, Zamuang lam atanga Kawlphetha lakluhna kawngah harsatna  a awm a nih loh chuan mipuite hnena eng pawk kawngah harsatna lian tham a thlen loh beisei a nih thu EE chuan a sawi bawk.
 

W. Phaileng atanga Kawlphetha lakluhna kawng thinga vuaktirtute hi a siamthatna senso tumtir an nih tur thu EEP&E Mamit chuan a sawi.

 

WORLD ENVIRONMENT DAY 2024 PUALIN GHS MAMITAH HUN HMAN A NI

  Nimin June ni 5 (Nilaini) kha World Environment Day (WED) 2024 niin khawvêl puma lawm a ni a, he nmi pual hian Mamitah pawh hun hman a ni.

World Environment Day 2024 pual hian nimin chawhnu dar 1:30 khan Govrt. High School Mamitah hun hman a ni a, Pu C. Lalrinmuana DFO Mamit Forest Division chuan he hun hi a hmanpui. 

Zirlai kalkhawmte zingah thusawiin Pu C. Lalrinmuana DFO chuan   kumin World Environment day thupui “Leilung dinhmun chhe lai tuam dam , chhiatna thlen belh tir theitu dolet leh Khawkheng laka tang tlat thei  tura siam that” a nih thu a sawi. 

Hemi beh chhan hian Ramngaw pawimawhna te,  tih chereu pawizia leh a nghawng thalo te tarlan a ni a. Ramngaw leh Nungcha humhalh a tulzia leh Tuihna a pun theih nana  thingphun uar a tul thu te leh hmalakn a tur dangte sawi lan a ni.
 

Single use Plastic hman chung chang leh Duhdah taka Plastic bawlhhlawh paihin nghawng a neih dan te, Plastictic hmanrua hmang tlem dan tur in zirtirna te neih hnuah Thutiam(Pledge) lakna hun in khar a ni a,  Thingphun in hun hman zui a ni.

World Environment Day pualin kawng zawh

 Vawiin hi  World Environment Day a ni a, he ni puala  thlan “Land Restoration, Desertification and Drought Resilence” tih hmanga activities ti tura Mizoram Pollution Board in Zirna Ina  Eco Club zawng zawng te a ngen angin tukin zing dar 6 khan Mamitah pawh he ni pual hian hun hman a ni.
 
World Environment Day 2024 pual hiian  Mamit town area chhunga Eco Club School ten tukin zing dar 6:00 AM khan DEO Office kawt atang in kawng an zawh a, Charkawn ah tawp a ni.

He huna thusawitu Pu Laldingliana District Education Officer, Mamit chuan “Kan environment lo chhe mek hi siam that theih a la ni. Tui hna kang chat mek te, leilung khawro em em te, ruahtui mumal lo te, pollution nasa chho zel te hi a siam tha turin mi tinten tan la ila, sorkar leh zirlaite pawhin awareness kan neih that hle a ngai a ni” a ti.

District Hospital Mamit atanga refer mi 21 zet an awm

 May 2024 chhung khan Mamit District Hospitalah mitthi 13 awmin damlo 21 zet Aizawl lam refer an ni.
 

District Hospital Mamitah hian May thla chhung khan damlo dahluh (admit) 109 an awm a, natna chi hrang hrag avanga doctor pan (OPD a inentir) mi 1639 an awm. Rikruk thil (Emergency)  avanga District Hospital pan mi 402 an awm a, naupiang 13 awmin nu pum chhunga thi pakhat a awm bawk.

SAI CHHAWR LAIIN KHAWLAI CHARAH KUM 76 A UPA A NAWR TLU

 Vawiin tlai dar 5:30 vel khan Teak thing hnuk tura chhawr Saiin Mamit Charkawn khawlaiah Pu R. Sangthuama Kum 76 mi chu a tauh tlu a, Pu Sanga hian lang theiah hliam na lutuk a tuar lo nia hriat a ni.

Vawiin tlai dar 5:30 vel khan Mamit khawpui chhung,Charkawn khawlaiah Sai pathum chu an pute nen an lo kal a, heng Sai pathum zinga a te ber hian kawng sira lo ding Pu R. Sangthuama (76), Mamit Charkawn chu a nawn hmangin a tauh tlu a, Pu Sanga hian lang theiah chuan hliam na lutuk a tuar lo niin hriat a ni. Pu Sanga hian a taksa hmun then khatah pem tenau tete a nei a, na lutuk a neih loh thu amah Pu Sanga chuan a sawi.

Pu R. Sangthuama hi zanin khan Mamit District Hospital Casualty ah hruai a ni a, enkawlna hmasa (First aid) pek niin a pem te tihfai a ni a, X-Ray pawh tih nghal ngai rih loha ngaih niin In lamah hawtir leh an ni.

Vawiin tlai vek khan Sai hi umzui nghal a ni a, sai pute hian an din khaw muan chuan mihring pungkhawm leh sai thinrim avanga harsatna lian zawk a chhuah an hlauh thu a umtute hnenah hian an sawi a, Pu R. Sangthuama inenkawlna senso atan Rs 2000/- an pe a ni.

Sai chhawr laiin pawi a khawih tih hriat a nih veleh Mamit Forest Department lamin hmalakna an kalpui nghal a, thil tul ang ang buaipui nghal niin hmalakna pawh chak taka kalpui chhunzawm tum a ni. Hemi chungchanga Mamit Times zawhna chhangin Pu C. Lalrinmuana DFO Mamit chuan Sai chhawr lai/Vulh lai in mi a tipalh chungchangah, vulh lai an nih miau avangin  Forest department ang chuan tih theih leh tihtur teh chiam an nei lo a, Sai chhawrtu/neitu leh a tihpalhte inkar thu ni mai tura a ngaih thu a sawi. Hetihlai hian, State dang atanga Mizorama Sai chhawr tur lalut tur hian an hriselna a tha tawk a ni tih fiahna AH&Vety Department atanga an neih a ngai a, Chief Wildlife Warden phalna lak a ngai bawk a, heng zawng zawng hi zawm chunga tuna mi tipalhtu  Saite hi lakluh an nih leh nih loh erawh departmentin a enzui tur thu a sawi.

Vawiina mi tipalhtu Sai pathum hi Tripura atanga lakluh niin Teak thing hnuka Tut kam, Phaizau khaw chhak lama chhawr an nih thu leh Phaizau atanga Tripura pan tur, Mamit kaltlang an nih thu kan thudawnna chuan a sawi bawk.

He thil thleng chungchangah hian Sai chhawrtu Pi Lalnunkimi Bairabi chu Mamit Times chuan a be pawp nghal a, Pi Nunkimi chuan an sai chhawr in mihring a tipalh chu pawi an tih thu a sawi a, a tuartute ngaihdamna an dil a, a tuartute pawh an biak pawh nghal tur thu leh a tul ang anga inenkawlna  senso tumsak an inhuam thu a sawi.

ZORAM THAR THLEN HUN TUR

 Hmasawnna hnathawh lian tham reng reng, a enkawltu leh mawhphurtu sawrkar department an awm vek a, hna chhiat leh that hi an mawhphurhna a ni. Hetiang a nih lai hian, Mizoram chhung bikah chuan hmasawnna hnathawh reng reng mipui leh pawl anga vilpui leh venpui a nih loh chuan ngaihthatlohna mipui rilruah a awm tlat a, hei hi hun rei tak kal tawh atanga hnathawh dan, mawhphurhna neitu ten an vil leh ven danah tha tawk lo leh duhthusam tawk lo a awm thin vang niin a lang.

Hun kal tawha hmasawnna hnathawh vil leh ven kawnga mawhphurhna neitute kha an dik lo vek a, an fello vek e tihna ni loin, mahni tanghma haia hlawkna tel ve talh lo tum thin mi tlemte avangin rin an hlawh zolo fo a, ram pum mipui rilruah ngaihthat lohna a intuh nghet ta mai niin a lang. Tunlaiah, thalai zawk, ram leh hnam, mipui hmangaihna tak tak nena hnathawk sawrkar official zingah an pung chho zel a, hei hian beiseina sang tak erawh min neihtir mek a ni. Anni hun hmaa mi duham fal bikte thil tih thin dan hnawl ngam, an lo duh thin ang do ngam mihring kan officialte zinga an tam poh leh a tha zawnga hmasawnna kan hmu zel ang.

Political party huang chhungah chuan mithar leh naupang zawkte chunga mipui beiseina nghahna hi a thlawn deuh vek niin a lang thin. Mipuiin beiseina sang tak nena an thlir pawh, an pu ten an duh tawka an thluak an suk hnu, party huang chhunga hman tlak nia an ngaih meuh chuan, a tha lo kan tih thinte ang bawkah khan an lo chhuak tawh thin a, beiseina sang tak kha beisei tibotu, tui tihal leh dangtiro thlawn mai an ni thin. Kan sawrkar officialte zingah erawh hetiang hi a thlen ve loh beisei ila, kan ram chhe mek nia kan sawi thin siamtha tura mipui nawlpui beiseina an ni tih an inhriat a pawimawh awm e.

Sawrkar hnathawk lian leh hmasawnna hnathawh kawnga mawhphurhna sang tak neite hi an awmna ngaiah an awm reng ngai lo. Khawi hmunah pawh awm se, an thawh chhan hi ram leh mipui an ni tih an hriatreng a pawimawh. An thuneihna leh an tih theih chinah, a tha ber zela hna an thawh chuan ram siamthatna kawnga sulsutu pawimawh tak an ni reng dawn a ni.Thil tha leh dik an duha an thawh vanga mi tlemte huat an hlawh a nih pawhin an lamah mipui an tang tlat ang a,diklo taka thunun tumtute huaisen taka dolet ngam, ram, khawtlang leh mipui tana tawrh pawh huam khawpa nghet taka an ding ngam a nih chuan an chanchin a tha zawnga sawi zui reng a ni tawh ang.
 

Kan Politiciante leh kan sawrkar official zingah “Hming chhiat leh mualpho hun chhung a rei lo” ti niawm taka hming that aia sum tam tak um zawk thin, hmasawnna hnathawhna tur pawh an bank account tihpunna tura hman lo tum ve tlat thinte hi an lo ral vek hunah emaw, hetiang ang mi hi khawtlang mipui, Pawl hrang hrang leh Kohhran ang pawha kan endawng a,an inhumhimna bang phen atanga kan hnuh chhuah ngam hunah, chumi hunah ngei chuan mi tam takin an sawi fo thin “Zoram thar” kan hmu ang.

NH NO 6 RUAHMANNA THEHLUH A LA NI LO, KAWNG CHHE THAWM HNA A MUANG

 Mamit leh Bairabi inkar kawngpui National Highway No 6 peng pakhata puan tak thawm that hna MPWD Highway Division I ten an thawh mek chu Ni 31/5/2024 khan Mizoram Journalists” Association, Mamit District chuan a hmunah an tlawh.

Cheng nuai zali sawmthum pathum (Rs 433 lakhs) senna tura ruahman, Kilometer 38.8 a thui, Mamit leh Bairabi inkar kawng, National Highway No 6 peng pakhata puan tak chu a chhe zual thawm that hna thawh mek a ni a, mipui beisei angin hnathawh erawh a sawt viau thei lo.

He kawngpui chhe zual thawm that hna, April 2024 atanga thawh tan hi Ni 31/5/2024 khan MJA Mamit District chuan a hmunah an tlawh a, Hnathawh enkawltu MPWD Highway Division I, Sub-Division I SDO Pu Lalrinhlua’n MJA memberte hi kaihhruaiin an hriat duh leh tul ang angte inhrilhhriatna hun hman a ni.

He kawngpui thawm that hna thawh mek hi MPWD Highway Division I leh Division III ten an inthawh sem a, Highway Division I hian Mamit 0 point atanga 22km thleng an thawk ang a, Division III hian Bairabi lam atangin a bak zawng an thawk thung ang. Hna thawhna tura sum ruahman Rs 433 lakhs hi heng Division pahnih hian an insem dawn a, an sum insem dan tur ruahmanna kimchang erawh hriat theih a la ni lo.

Tun dinhmunah Highway Division I hian Vawngawnzo bul hnai, a chhe zual lai an khawih zo thawkhat a, Zirtawpni khan Mamit atanga 9km leh 12km inkar an khawih tan a ni. An hnathawh tawh zawng zawng hi hnathawh tur atanga za zela 15 (15%) vel anga chhut a ni a, kawng thawm hi Boulder hmanga a chhe zual thawm leh chil mam a ni deuh mai a, Black top turin sum hian a daih dawn lo nia ngaih a nih thu Pu Hlutea SDO MPWD Highway Divsion I, Sub-Division-I chuan a sawi.

Kawng thawm mek hnathawh a sawt loh chhan hi lung hman tur an duh khawp an hmuh loh vang nia sawi a ni a, hei ai mah hian hnathawhna tur sum, Regional Office Guwahatti atanga an la hmu lo chu a chhan ber niin a lang. Mamit khawpui chhung leh khawpui pawna Lung lakna (Quarry) nei ten sum awm loa lung pek an harsat chu hnathawh chak theih loh chhanah ngaih a ni.

Tun dinhmunah, he kawng thawm hna thawh mekah hian cheng nuai sawmli panga (Rs 45 lakhs)  zet bat khawl a ni tawh a, STMC kaihhruaina anga thla khat chhung (April 2024) atana sum hmuh tura beisei, June thla a hmuh beisei mek hi cheng nuai sawmhnih pakua (Rs 29 lakhs) a ni a, heng atang hian GST, Labour Cess etc  pawh thlak (cut) a nih hnua hnathawhna tur sum beisei theih zat hi cheng nuai sawmhnih (Rs 20lakhs) vel awrh a ni thung.

Mamit leh Bairabi inkar National Highway No 6 a puan tak hnathawh theih hun tura beisei MJA memberte zawhna chhangin Pu Hlutea chuan tun dinhmunah a kawng kalna tura survey report theh luh a la ni lo a, hnathawhna tura Detail Project Report (DPR) khawr fel (Final) theih a la ni lo tih a sawi a, heng thil tul ang zawng zawng hi October 2024 ah Regional Office ah theh luh hman beisei a nih thu a sawi.

He kawngpui siam tura sum ruahman hi Parliament Cabinet pawmpui ngai tur a nih avangin hun a duh hret a rin thu Pu Hlutea chuan  sawiin, harsatna awm loa, tluang taka ruahmannate pawm zung zunga kalpui theih a nih chuan March 2025 ah hnathawh tan tak tak theih beisei a nih thu a sawi.

He kawngpui siam turah hian a tha ber zel hmuh an beisei tih MJA memberte chuan an sawi a, hetiang taka hmalakna kalpui tur hian MPWD Highway Division thuneitute chu an ngen a ni.