LPS-Pro Fight Flyweight Quarter Final khelh turah Mamit tlangval Chhana’n chak ngei a inring

 LPS Pro-Fight khelh mekah Mamit tlangval C. Lalchhanhima S/o Lalropuia (L) Mamit Mizoveng chuan Flyweightah quarter final a luta, zanin hian Lalhruaitluanga Colney Bawngkawn, Aizawl nen an inhnek ang.

Venghlun Branch YMA Sports Sub-Committee Chairman Pu Runremmawia Khawlhring chuan an member, hetiang anga infiamna lama thui tak kal thei an nei hi chhuanawm an tih thu a sawi a, a tan tih theih leh thawh theih an nei loa, an tih theih ang tawk, a tana thilpek pekna an ruahmanah mi inphalte thilpek a lut zel chu lawmawm a tih thu sawiin Chhana puala thilpek bawm an dawh mekah thahnemngai taka pe zel turin mi inphalte an sawm tih a sawi bawk.

Zanina an inhnek tur chungchang Mamit Times zawhna chhangin Chhhana chuan a tumpui tur hi a huphurh bik loh thu a sawi a, harsatna dang a tawk a nih loh chuan, hnehna a chan ngei a beisei thu leh chutiang tura a inbuatsaihna a that tawk thute, a fitness a that tawk thute a sawi.
LPS Pro-fight a khelh mekah, amah tantu atana theih tawp chhuahtute zawng zawng chungah lawmthu a sawi a, a pual thilpek pek theihna ruahmantute leh phal taka thilpek petute chungah lawmthu a sawi a, a phu loh chawimawina a dawng nia a hriat thu a sawi bawk.

C. Lalchhanhima hi kum 2022 atang khan LPS-Pro-Fight ah hian a lo inlan ve tawh a, a duh ang leh tum ang thleng pha thin lo mahse beidawng mai loin nasa zawkin a inbuatsaih chhunzawm zel a, tunah hian Sete Boxing Academyah Boxing a zir mek a ni.

Zanina Chhana te inhnek hi Siamliana Hall, Charkawnah big screen hmanga en theih turin Venghlun Branch YMA Sports Sub-Committee chuan ruahmanna a siam a ni.

Mamit Venghlun tlangval, LPS Pro-fighta quarter final khel tur puala thilpek pe duhte tan Venghlun Branch YMA Sports Sub-Committee leh mi thahnemngai ten thilpek pek theihna an ruahmana, mi inphalte hnen atangin thilpek engemawzat a lut tawh a, a pe duh tan pek theih reng a la ni.

Champhai District MJA President a thi

 Mizoram Journalists’ Association Champhai District President nihna chelh mektu Pu Lalhmingmawia Pachuau (64) Editor Pasaltha chu nizan khan Cancer natna avangin a boral a, vawiinah vui a ni ang.

Pu Hmingmawia hian a nupui leh fa pali a kalsan a ni.
 

CSR HMANGA SAK COMMUNITY HALL YMA KUTAH HLAN FEL A NI

 Nimin khan POWERCRID Corporation of India CSR Fund hmanga Rs. 9,50,000/- (nuaikua leh singnga) senga sak, Chhippui Community Hall chu Pu Moses Ramdinthara, SDO (Civil) W. Phaileng chuan Chhippui Branch YMA-te kutah tangkai taka an hman a tan a hlan.

 Pu Moses Ramdinthara chuan Chhippui khawtlangin an mamawhna hria a, Community Hall sakna atana Mamit District Bawrhsap hmalakna leh ngenna anga, CSR te'n Hall tha tak an sak sak chu lawmawm a tih thu a sawi a, Community Hall sak a nih theih nana sum thawhtu CSR-te chungah District Bawrhsap aiawha lawmthu sawiin, vantlang thilte duat nachang hre tur leh mahni ta anga en thiam turin Chhippui khaw mipuite a chah a ni.  

Chhippui Community Hall sak hna hi ni 26th July, 2023 khan thawh tan a ni.Community Hall sak zawh hi Pu Hrangchhuana Sailo, General Manger- in DC kuta a hlan angin SDO (Civil) W. Phaileng hian Mamit District Bawrhsap aiawhin vawiin hian Chhippui YMA kutah a hlan ta a ni.

Mobile phone rutu a puh man a ni

 Nimin Ni 21/11/2024 zing khan Mamit Police Stationah Mobile phone bo chungchangah thubuai Mamit P/S Case No 91/2024 Dt 21.11.2024 ziah luh a ni a, hei hi chhui zui nghal niin mobile phone rutu nia hriat hi man chhuah nghal a ni a, a phone ruk pawh hmuh letleh a ni. Mobile phone rutu a puh hi nimin vek khan District Jailah dah luh nghal a ni.

 Tun hnaia ruk ruk leh In rawk tam lutuk chungchangah Pu Zosangliana SDPO Mamit chuan mitin fimkhur turin an ngen tih a sawi a, fimkhur tawk loh vanga rukruk leh In rawk thleng a tam thu a sawi. Mahni In chhuahsan dawn leh mut dawna fimkhur taka kawngka kalh turte, thil hlu lak mai theiha dah lo turte leh lirthei kalsan tur uluk taka enfel leh kalh fel thlap a tul thute a sawi.

Khawng zawka lirthei thunun tum

 Kristiante hunpui - Krismas leh Kumthar lawmna hun lo thleng turah lirthei chetsualna thleng thei laka mipui himna turin lirthei chevel thunun kawngah khawng zawka kal an tum tih Pu Lalpianthanga Addl.SP Mamit chuan a sawi.

Mamit Times zawhna chhangin Addl. SP Mamit chuan lirthei chetsualna thleng thei laka mipui himna turte, lirthei kalhtu dan bawhchhia an awm lohna turin khawng zawka lirthei chevel thunun tum a nih thu a sawi a, dan bawhchhia hremna a sang tawh hle tih sawiin heng hremna laka mitin an him  theihna turin lirthei khalhtu leh khalhtirtute fimkhur turin an ngen tih a sawi.

KUM 2024 CHHUNGIN MAMIT DISTRICT AH PAWIKHAWIHNA 200 ZIAH LUH A NI TAWH

 Nimin Dt. 20.11.2024 (Nilaini)  hian Pu Pukhraj Kamal, IPS, Superintendent of Police, Mamit District kaihhruainain Mamit District Crime Review Meeting chu SP Conference Hall, Mamit ah neih a ni a. Mamit District chhunga SDPO Pathum te leh Police Station panga leh Outpost pakhat atangin Officer-in-Charge te Crime Meeting ah hian an tel a ni.

 

He Crime Review Meeting-ah hian Mamit District chhunga Criminal Case la chinfel loh (Pending Investigation) chungchang sawihona neih a ni a. Hnuchhuina kawnga hmalak zel dan tur sawiho a ni a. Tin, Thil sual tihna chi hrang hrang lo thleng thei te venna kawnga hmalak dan tur te, Mamit District chhunga mipui te him leh muang taka an awm theihna tura hmalakna tur te sawiho a ni bawk.  

Kum 2024 chhungin Mamit District chhungah hian criminal case 200 (zahnih) ziahluh tawh a ni a, Case ziahluh zingah hian Burglary (In rawk) tam berin case 64 ziahluh a ni a, Theft (rukruk) case in dawtin case 63 ziahluh tawh a ni bawk. POCSO (Naupang khuaikhem) case 10 ziahluh niin, Zu man (MLP Act) case 17 leh Damdawi man (NDPS Act) case 14 ziahluh tawh a ni bawk. Tualthahna (Murder) case hi 1 ziahluh niin, Pawngsual (Rape) case hi 1 ziahluh tawh ani bawk.

Tin, hei bakah  hian Dan thar  kan hman tak ah  leh e-Sakshya App (Digital evidence Collection) chungchang ah te training neih a ni bawk.

Tlawmngai Pawl hrang hrang aiawh leh District Bawrhsap inkawm

 

Nimin Ni 19/11/2024 khan DC Conference Hall, Mamit-ah Tlawmngaipawl aiawh, YMA, MZP, MSU, MHIP, MUP leh Kohhran hruaitu aiawhte nen Mamit District Bawrhsap thar Pu K. Laltlawmlova hovin Mamit hmasawnna tur hrang hrang sawiho a ni.
 

District Bawrhsap thar Pu K.Laltlawmlova chuan Mamit District chhunga tlawmngaipawl hrang hrang hruaitu leh kohhran hruaitu aiawh kalkhawmte hnenah lawmthu sawiin, Mamit Bawrhsap hna a thawhna turah an thawhpuina, tawiawmna leh tanrualna a pawimawh dawn thu a sawi a, chumi tello chuan hmasawnna hna a thawh theih loh thu leh amah ngei pawh finchhuah hrehlo turin a chah a. Mamit District chu Aspirational District kan nih angin hmalakna tur a tam dawn hle a, chumai bakah ramri dep a awm kan nih avangin ruihhlo leh a kaihnawih lakluhna remchang tak awmah te thawhhona tha tak hnuaia hma la ho zel turin kalkhawmte a sawm a ni.
 

Kalkhawmte atangin Mamit hmasawnna atana hmachhawp hrang hrang tui, kawng, coaching centre, District Hospital Building thar luah, ruihhlo dona kawnga hmalakna turte leh thil dang danga sawihona neih te chu District Bawrhsap chuan ngaih-thlak sakin a theih ang anga tihlawhtling tura hmalak tum a nih dawn thu a sawi

MJA MEMBER TEN DISTRICT BAWRHSAP THAR HNENAH MAMAWH HRANG HRANG AN THLEN

 Ni 15/11/2024a Mamit District Bawrhsap mawhphurhna latu Pu K. Laltlawmloa chuan Ni 18/11/2024 khan Mamit District MJA memberte chu lengah sawmin Mamit District leh Khawtlang tana pawimawh hrang hrangte an sawiho.

 

 Nimin Ni 18/11/2024 chawhnu dar 1:30 khan Mamit District Bawrhsap thar Pu K. Laltlawmloa chuan Mamit District MJA memberte chu a Pisaah lenga sawmin inkawmhona hun an hmang a, Mamit Distrioct leh khawtlang tana thil pawimawh hrang hrang an sawiho.

District Bawrhsap chuan MJA memberte chu  sawrkar leh mipui inkara palai hna thawktu an nih anga thudik leh rintlak mipui hnena puangzar thin turin a chah a, thu leng vak satliaha innghat loa, finfiahna tha tak neih tum thin turin a chah. Infinchhuah tawn reng an mamawh thu sawiin District tana theih tawp chhuah tlan tul a tih thu a sawi.

MJA Mamit District memberte chuan Mamit District leh Mamit khawtlang tana hmasawnna hnathawh kawnga harsatna hrang hrang awmte chu sutkian a nih theihna tura ngaihtuahna hman a tul thu an sawi  a, MJA memberte chuan an ngaihpawimawh leh tul hmasa nia an hriat heng - Mamit leh Bairabi inkar kawngpui thawm that hna thawh mek chak zawka thawh a nih theihna tura hmalak a tul thute, PHED tui lakna kawng chhe reng thawm that a nih theihna tura puih dan kawng zawn a tul thute, National Highway No 6 kal tur, kal pawhna kawng siam tura ruahmanna neih thuai a tul thute an sawi.

District Bawrhsap Pu K. Laltlawmloa chuan Mamit District MJA memberte thu thlen chu thil pawimawh tak tak a nih avanga lo enzui a tum thu a sawi a, a tul ang zela hmalakna kalpui a nih theihna turin ziaka a hnena thlen turin a hrilh a ni.

TUI KAWNG SIAM HNA THAWH TAN A NI DAWN

 Mamit khawpui chawmtu Tuilak ziaawm zawka hmuh a nih theihna turin chak taka hmalakna kalpui mek a ni.

Tun dinhmunah Mamit khawpui chawmtu tuilakna kawng (pump line) chhe reng chuan tuisem chhuah kawngah harsatna a thlen nasa hle a, thawktute an hah a, mipuiin tui mamawh ang an hmu thei rih lo bawk. He harsatna sukiang turin hian hmalakna kalpui mek a ni a, tui lakna kawng chhe reng thlak tura hnathawh pawh tunkar chho atang hian tan theih beisei a nih thu PHED Mamit thuneitute chuan an sawi.

Pipe phurh luh theihna turin kawng chhe lutuk thawm that mek a ni a, Kurung lui lakna gavity line chhe vek thlakna tur pipe phurh luh tan a ni tawh a, hnathawktu tur (company) lut tawhin Kurung lui leh Lahmun lui lakna In-take  leh gavity line siam hna tan chhoh mek a ni. Hemi atan hian sum hmuh tawh niin 11.51 lakhs ruahman a ni.

 

Kawng chhia ber siamthat a nih chuan tui lakna kawng lian chhe reng thlak hna thawh a nih theihna turin pipe lian phurh luh theih beisei a ni a, pipe lian kalna tur kawng siama pipe chhe zual lai thlak hna hi thawh chhunzawm nghal theih beisei a ni bawk.

Tun dihmunah Lahmun lui tui chiah lak a ni a, Kurung lui lakna kawng siam zawh a niha, pipe line lian chhe lai thlak fel a nih chuan kan tui harsatna hian ziaawm lam a pan theih PHED thuneitute chuan an sawi a ni.

HNATHAWH HUN ṬHA INTAN MEKAH THEIH ANG ANGA HNA BUL TAN A NI

 Dated Mamit, the 08th  Nov.2024 :    Fur ruahtui tlain ziaawm lam a pan a, khua a tuihul chho a, kawng siam kawnga mawhphurhna neite tan hnathawh hun a intan rualin Mamit District leh Mamit khawpui chhungah MPWD leh Highway Division I te pawhin hna bul an tan chho mek.

National Highway 44A/108 chhe lutuk siamthat hna thawk tura Tlawmngai Pawl hrang hrang ten sawrkar an ngenna leh sawrkar thuneitu ten an tiam angin nimin Ni 7/11/2024 atang khan NH 44A/108 Dapchhuah leh Mamit inkar kawng chhe zual lai thawm that hna chu thawh tan a nih thu leh hnathawh pawh SDO Highway Division I in a a hmuna a enpui thu kan thudawnna chuan a sawi a, a tahtawla thawh chhunzawm zel tur a nih thu kan thudawnna chuan a sawi bawk.

Hetihlai hian, Mamit- Bairabi inkar kawngpui chhe lutuk pawh thawm hna thawh ve bek bek a ni a, hnathawh erawh mipui beisei angin a kal chak thei lo thung. Hei hi khawl leh hnathawktu indaih tawk loh vang niin department thuneitute chuan an sawi. He kawng siamthat hna thawh mekna atan hman tur pawisa hi awmsa vek tawh anga lang a nih laiin, a taka department kuta awm a nih loh vanga harsatna an tawh thin thu an sawi a ni.

MPWD Mamit pawhin Mamit khawpui chhung kawngpui thawm that leh hmun thenkhatah a tihzauh hna an thawk mek bawk a, tunah hian Mamit vengthar huam chhungah kawngpui siam zauh hna an thawk mek a, heng bakah hian Mamit khawpui chhung hmun hrang hrangah kawngpui thawm that hna an thawk chhunzawm zel dawn tih hnathawktute chuan an sawi. Kawngpui chep zual lai siam zauh mekte hi lirthei neitute tana lirthei dahna tur ni loin, lirthei tlanna tur zawk a nih avangin lirthei tlan/veivak tana kawng tichep zawnga lirthei hunna/dahna atana hmang lo turin lirthei neitute an ngen.

KAWNGPUI CHHE ZUAL LAI NI 7/11/2024 ATANGIN SIAMTHAT A NI DAWN

 Sub-Headquarters YMA Mamit kaihhruaina a Tlawmngai Pawl hrang hrang leh Khawtlang hruaitu, Political Party ten National Highway 44A/108 chhe lutuk siamthat a nih theihna tura sawrkar an dawr chuan rah tha a chhuah dawn niin a lang.

 Mamit District paltlangtu National Highway 44A/108, kum sawm chuang hnathawh a ni chung pawha zawh awm thei lo, tun dinhmuna lirthei chi hrang hrang tana tlan harsa khawpa chhia chuan mipui tan harsatna nasa tak a thlen avangin siamthat a nih theihna turin hmalakna hrang hrang a lo awm tawh thin a, sawrkar thuneitute dawrin hma-sawn zawnga hmalakna erawh hmuh mai a ni lo.
 

Hetiang a nih avang hian Sub-Headquarters YMA Mamit chuan na zawka sawrkar nawr leh kar a tul nia ngaiin Mamit khawpui chhunga tlawmngai pawl hrang hrang, political party leh khawtlang hruaitute nen inrawnkhawmna hun buatsaih a ni a, chumi thutlukna kal zelah chuan nimin Ni 4/11/2024 khan lamkal intirin Aizawlah sawrkar thuneitu hrang hrangte an dawr a, Mamit District paltlangtu National Highway No 44A/108 chhe zual lai siamthat hna chu Ni 7/11/2024 (Ningani) atanga thawh tan a nih tur thu sawrkar thuneitute chuan an lo sawi a ni.
 

Kawng chhe zual lai thawm that tur hi NiDHI Creative Infrastructure Pvt. Limited ten an thawk dawn a, Dapchhuah leh Mamit inkarah an thawk phawt dawn a ni. NH 44A/108 pam tul tak, thawh chhunzawm a nih theihna tura re-tender pawh kum 2025 February/March thla bawrah chuan tihfel theih beisei a nih thu an sawi bawk.
 

Tlawmngai Pawl hrang hrang aiawhte hian Mamit leh Bairabi inkar kawngpui hnathawh mek pawh chak zawka thawh a nih theihna turin thuneitute hmala turin an ngen a, hei pawh hi helaia hna enkawltute lo sawipui an tum tih Highway thuneitute chuan  an sawi.
Highway 44A/108 atanga Mamit luhna kawngpui tihzauhna tur ruahmanna a awm thu Tlawmngai Pawl aiawhte hi hrilh an ni a, Field leh PWD inkar kawng hnuai phei siamna tur pawh sum a awm tawh niin an sawi bawk.
 

Khawtlang mamawh nawr kawnga hmalaknaah, intih hranna awm loa lungrual taka hmalakna kalpuituite  chungah a hui khawmtu SYMA Mamit chuan lawmthu an sawi.

3-MAMIT (ST) A/C MLALADs FUND BIALTU MLA HNENAH RS 5,50,700/- PEK CHHUAH A NI

 Kum 2024-2025 sawrkar kum kal mek, April - June (1st quarter) ah 3-Mamit ((ST) A/C MLALADs fund atangin Rs 5,50,700/- pek chhuah a ni tawh.

Right to Information Act 2005 hmanga zawhna, State Public Information Officer, DC OfficeMamitin a chhannaa tarlan a nih danin Kum 2024-2025 sawrkar kum kal mek, April - June 2024 (1st quarters) chhungin 3-Mamit (ST) A/C MLA LADs fund Rs 5,50,700/- pek chhuah a ni tawh.

RTI dan hmanga Zawhna chhanna a tarlan a nih danin lehkha No B. 11011/28/2023-DC(M)/Part-I hmangin Ni 14.06.2024 khan Er. H. Lalzirliana, MLA 3-Mamit  (ST) A/C hnenah MLALADs fund atangin Rs 5,50,700/- pek chhuah a ni a, MLALADs fund hmanna nia tarlan hetiang a ni :
1. Purchase of Broiler Chicken
2. Purchase of foldable wheel chair
3. Purchase of G.I Sheet.

Govt. Mamit College ah Geography Subject zirtirtu a ba in chhawr mek a ni

 Kum 2020 November thla atanga 3-Mamit (ST) A/C MLALADs fund hmanga Govt. Mamit Collegea Geography zirtirtu rawih chu Kum 2023-2024 financial year tawp (March 2024) atang khan tihtawp a ni.

3-Mamit (ST) A/C vawngtu MLA Er. H. Lalzirliana chuan Govt. Mamit Collegeah Geography subject zirna a awm theihna turin nasa takin hma a la a, Kum 2020 November thla atanga July 2023 thleng khan GMC ah Geography zirtirtu pahnih a fund atangin a ruai a, August 2023 atanga March 2024 thleng khan pakhat rawih chhunzawm a ni.

Kum 2024-2025 sawrkar kum thar atangin GMC a Geography zirtirtu pakhat  MLALADs fund hmanga chhawr chu tihtawp a lo ni leh ta a ni.

Kum 2024-2025 Academic Session tharah GMC a Geography zirtirtu rawih chhunzawm loh theih loh a nih vangin GMC thuneitute hmalaknain a thawk lai hi thawh chhunzawmtir a ni a, a lawmman tur hi GMC in a ngaihtuah tawh ang. 

Hemi chungchangah hian Principal GMC chuan “Geography subject zirna kalpui laklawh a nih tawh avangin tihtawp thut a rem tawh lo a, zirtirtu lawmman pawh GMC in a ngaihtuah a ngai a, tlawmngaia thawk chhunzawm tura kan ngen angin a la thawk chhunzawm rih phawt ang a, a lawmman tur pawh kan bat ral sak bik lo turah kan ngai” a ti.

MLALADs fund atanga GMC a Geography subject zirtirtu rawihna tihtawp a nih tak chhungchangah 3-Mamit (ST) A/C bialtu MLA Er. H. Lalzirliana chuan MLA fund hmanna tur thil tam tak a awm ve thu sawiin, GMC a Geography zirtirtu rawih chungchang chu  State sawrkarin a ngaihtuah ve mai tura a ngaih thu Mamit Times zawhna a chhang.